کورونا متاثر رجسٹرڈ مزدوروں کو مالی مدد دے گی دہلی حکومت

دہلی حکومت نےفیصلہ کیا ہے کورونا وائرس (کووڈ19) کے دوران متاثر ہونے والے رجسٹرڈ مزدوروں اور ان کے اہل خانہ کو طبی سہولت کے طور پر پانچ ہزار سے 10 ہزار روپیے کی امدادی رقم دی جائے گی۔ دہلی حکومت کے محکمہ مزدور نے آج اس کا اعلان کیا۔ متاثر ہوئے رجسٹرڈ مزدوروں کو پانچ سے 10 ہزار روپیے کی امدادی رقم دی جائے گی۔ تعمیراتی مزدورں کی آر ٹی پی سی آر رپورٹ کی آئی سی ایم آر کے پورٹل پر جانچ کرکے امدادی رقم براہ راست ان کے کھاتوں میں بھیجی جائے گی۔ یہ امدادی رقم کورونا کے دوران مزدوروں کے مالی بحران کو کم کرنے میں کارآمد ہوگی۔

کہا گیا ہے کہ دہلی حکومت کی جانب سے مہاجردہاڑی اور تعمیراتی کاموں میں سرگرم مزدوروں کی دیگر ضروریات کو مکمل کرنے کے لیے دہلی کے تمام اضلاع میں کئی اسکول اور کنسٹرکشن سائٹ پر 150 سے زیادہ فوڈ ڈسٹریبیوشن سینٹر بھی شروع کر دئے گئے ہیں۔ ان مراکز کے ذریعہ اب تک تقریباً 83 ہزار فوڈ پیکٹ تقسیم کیے جا چکے ہیں۔

دہلی حکومت کورونا بحران کے وقت مہاجر، دہاڑی اور تعمیراتی مزدورں کی امداد کے لیے ہمیشہ تیار ہے۔دہلی کے وزیراعلیٰ اروند کیجریوال نے بھی مزدوروں اور مہاجروں سے اپیل کی تھی کہ وہ دہلی نہ چھوڑیں کیونکہ دہلی حکومت ان کے لیے ہر طرح کا تعاون یقینی بنا رہی ہے۔

غور طلب ہے کہ دہلی حکومت نے دارالحکومت کے رجسٹرڈ تعمیراتی مزدورں کو پانچ پانچ ہزار روپیے کی مالی امداد دی گئی ہے۔ اب تک تقریباً دو لاکھ مزدوروں کو 100 کروڑ کی مدد دی گئی ہے۔ گذشتہ برس دہلی میں رجسٹرڈ تعمیراتی مزدوروں کی تعداد تقریباً 55 ہزار تھی، انھیں گزشتہ برس بھی لاک ڈاؤن کے دوران دہلی حکومت کی جانب سے پانچ پانچ ہزار روپیے کی امدادی رقم دی گئی تھی۔ دہلی میں فی الحال ایک لاکھ 72 ہزار رجسٹرڈ تعمیراتی مزدور ہیں۔