حکومت نے دہلی میں ایمبولینس کے ریٹ فکس کئے

دہلی: حکومت دہلی نے جمعرات کے روز کچھ پرائیویٹ ایمبولینس سروس فراہم کرنے والے یا ڈرائیوروں کے ذریعہ کورونا بحران میں حد سے زیادہ فیس وصول کرنے کی اطلاع پر نوٹس لیتے ہوئے پرائیویٹ ایمبولینس کی شرحیں طے کر دی اور حکم کی خلاف ورزی ہونے پر سخت کارروائی کی وارننگ بھی دی ہے۔

سنٹرلائزڈ ایکسیڈنٹ اینڈ ٹروما سروس (سی اے ٹی ایس) کی طرف سے جاری آرڈر کے مطابق مریضوں کی ٹرانسپورٹ ایمبولینس (پی ٹی اے) کی فیس 10 کلومیٹر کے لئے 1500 روپے مقرر کی گئی ہے اور اس سے زیادہ فاصلہ طے کرنے کی صورت میں ڈرائیور 100 روپے فی کلومیٹر ہی وصول کر سکتا ہے۔ اسی طرح بیسک لائف سپورٹ ایمبولینس (بی ایل ایس) کی فیس 10 کلومیٹر تک 2000 روپے مقرر کی گئی ہے اور اس کے بعد 100 روپے فی کلو میٹر فیس وصول کی جا سکے گی۔

ایڈوانس لائف سپورٹ ایمبولینس (اے ایل ایس) کے لئے جس میں ڈاکٹر کی فیس بھی شامل ہے، اس کا کرایہ 10 کلومیٹر تک چار ہزار روپے مقرر کیا گیا ہے اور اس کے بعد فی کلومیٹر 100 روپے فیس مقرر کی گئی ہے۔ حکم نامے میں کہا گیا ہے کہ اگر کوئی شخص اس کی خلاف ورزی کرتے ہوئے اضافی فیس وصول کرتا ہے تو ڈرائیور کا لائسنس یا گاڑی کا رجسٹریشن منسوخ کردیا جائے گا۔ گاڑی کو بھی ضبط کیا جاسکتا ہے۔

آرڈر میں کہا گیا ہے کہ اگر کسی ایمبولینس کو ٹول فری نمبر 102 کے ذریعہ بک کیا جاتا ہے اور سی اے ٹی ایس کے ذریعہ فراہم کی جاتی ہے تو اس کے لئے کوئی معاوضہ نہیں لیا جائے گا۔