دہلی: امیر بنانے کا خواب دکھا کر ٹھگی کرنے والا فرضی بینک ڈائریکٹر گرفتار

نئی دہلی: دہلی پولیس نے غریبوں کو امیر بنانے کا خواب دکھا کر ان کے خون پسینے کی کمائی کی رقم ٹھگنے والے ایک فرضی بینک کے ڈائریکٹر کو گرفتار کیا ہے۔ دہلی پولیس کے اقتصادی جرائم ونگ کے ایڈیشنل کمشنر آر کے سنگھ نے اتوار کو ’یواین آئی‘ کو بتایا کہ ملزم مراری کمار سریواستو کو بہار کے ضلع سیتامڑھی کے ہمایوں پور سے گرفتار کیا گیا ہے۔ وہ تقریباً تین سال سے مفرور تھا۔ اسسٹنٹ ڈپٹی کمشنر پولیس ویرندر ٹھاکرن کی نگرانی میں سب انسپکٹر سشیل کمار، حوالدار ستبیر سنگھ اور کانسٹبل منیش کی ایک خصوصی ٹیم نے چھاپہ مار کر اسے تکنیکی اور دیگر مقامی انٹیلی جنس کی مدد سے گرفتار کیا۔

آر کے سنگھ نے کہا کہ مراری اور دیگر کے خلاف 14 ستمبر 2018 کو معاشی جرائم کے ونگ میں 38 لوگوں کی مشترکہ شکایت پر ایف آئی آر درج کی گئی تھی۔ ایف آئی آر تعزیرات ہند کی دفعات 406، 409، 420 اور 120-B کے تحت درج کی گئی۔ اب تک کی تفتیش میں مبینہ میسرز پروگریس پروڈیوسر کمپنی لمیٹڈ کے نام پر 531 بھولے بھالے غریبوں سے تقریباً ساڑھے تین کروڑ روپے کے فراڈ کا انکشاف ہوا ہے۔ یہ کمپنی ریزرو بینک آف انڈیا میں رقم جمع کرنے کے لیے رجسٹرڈ نہیں ہے، لوگوں نے پرکشش رٹرن کے جھانسے میں آکر پیسے جمع کرائے تھے۔

دریں اثنا، جب لوگ سال 2018 میں سود سمیت پوری رقم لینے گئے تو انہیں مختلف طریقوں سے گمراہ کیا گیا۔ اسی دوران ایک دن اچانک مبینہ ڈائریکٹرز کمپنی کے شٹر بند کر کے بھاگ گئے۔ تب لوگوں کو احساس ہوا کہ ان کے ساتھ دھوکہ ہوا ہے اور انہوں نے اس سلسلے میں پولیس سے شکایت کی۔

الزام ہے کہ لوگوں کے پیسے فکسڈ ڈپازٹ اور دیگر اسکیموں میں میسرز پروگریس پروڈیوسر کمپنی لمیٹڈ نامی ایک جعلی کمپنی میں جمع کروائے گئے، جس نے 18 فیصد سود کے ساتھ رقم واپس کرنے کا وعدہ کیا تھا، لیکن اس کمپنی نے وقت پر پیسے واپس نہیں کیے گئے۔ جب سرمایہ کاروں نے وعدے کے مطابق رقم واپس مانگی تو مراری اور دیگر مبینہ ڈائریکٹرز گھر بیچنے کے بعد راتوں رات دہلی سے بھاگ گئے۔ یہ مبینہ کمپنی دہلی کے پہاڑ گنج میں ایک عمارت میں چل رہی تھی۔

انہوں نے کہا کہ دھوکہ دہی کا زیادہ تر شکار کم آمدنی والے گروپ سے آتے ہیں۔ وہ ٹھگوں کی دلکش اور پر کشش جھانسے میں آگئے اور بہتر مستقبل کی امید میں اپنی محنت کی کمائی کا ایک حصہ جمع کرتے رہے۔ انہیں ایک حقیقی بینک کی طرح کمپنی نے پاس بک بھی دی ہوئی ہے۔