دہلی آبکاری پالیسی: بی آر ایس لیڈر کے. کویتا سے اب سی بی آئی کرے گی پوچھ تاچھ، عدالت نے دی اجازت

بی آر ایس لیڈر کے. کویتا کے لیے مشکلیں بڑھتی ہوئی دکھائی دے رہی ہیں۔ دہلی آبکاری پالیسی معاملے میں جیل میں بند کویتا سے اب سی بی آئی پوچھ تاچھ کرے گی۔ جمعہ کے روز سی بی آئی نے ان سے پوچھ تاچھ کرنے اور ان کا بیان درج کرنے کی اجازت کے لیے دہلی کے راؤز ایونیو کورٹ میں ایک عرضی داخل کی تھی۔ عدالت نے اس عرضی پر سماعت کی اور دونوں فریقین کو سننے کے بعد اب سی بی آئی کو کویتا سے پوچھ تاچھ کرنے اور ان کا بیان درج کرنے کی اجازت دے دی ہے۔

واضح رہے کہ کے. کویتا فی الحال دہلی آبکاری پالیسی سے متعلق ای ڈی کے معاملے میں عدالتی حراست میں ہیں۔ اسی معاملے میں دہلی کے وزیر اعلیٰ اروند کیجریوال اور سابق نائب وزیر اعلیٰ منیش سسودیا بھی جیل میں قید ہیں۔ تینوں ہی لیڈران تہاڑ جیل کے الگ الگ کمروں میں ہیں اور اپنی ضمانت کے لیے قانونی لڑائی لڑ رہے ہیں۔ جہاں تک کویتا سے سی بی آئی پوچھ تاچھ کا معاملہ ہے، تو عدالت نے ایجنسی سے کہا ہے کہ پوچھ تاچھ سے ایک دن قبل جیل انتظامیہ سے اجازت لینی ہوگی۔

قابل ذکر ہے کہ سی بی آئی کو کویتا سے پوچھ تاچھ کی اجازت ایسے وقت میں ملی ہے جب ایک دن قبل ہی ان کی ضمانت عرضی پر سماعت ہوئی تھی۔ جمعرات کو راؤز ایونیو کورٹ نے کویتا کی عبوری ضمانت عرضی پر سماعت کرتے ہوئے فیصلہ محفوظ رکھ لیا تھا جو 8 اپریل کو سامنے آئے گا۔ علاوہ ازیں کے. کویتا کی مستقل ضمانت کی عرضی پر سماعت 20 اپریل کو ہوگی۔