دہلی کانگریس لوک سبھا الیکشن 2024 کے لیے 3 فروری کو بجائے گی بگل

نئی دہلی: کانگریس پارٹی کے قومی صدر ملکارجن کھڑگے کی قیادت میں دہلی کانگریس کی ’عظیم ریلی‘ کا انعقاد 3 فروری 2024 کو رام لیلا میدان گیتا کالونی میں کیا جانا ہے جس کے پیش نظر آج کانگریس پارٹی کی ایک اہم میٹنگ موجپور میں منعقد کی گئی جس میں مہمان خصوصی کے طور پر دہلی پردیش کانگریس کمیٹی کے صدر اروندر سنگھ لولی نے شرکت کی۔ صدارت بابرپور ضلع کانگریس صدر چودھری زبیر احمد و آدیش بھاردواج نے کی جبکہ نظامت کے فرائض ڈیلی گیٹ سید ناصر جاوید نے بحسن و خوبی انجام دیے۔ میٹنگ میں شمال مشرقی دہلی لوک سبھا کے سبھی کانگریس عہدیداران و کارکنان پرجوش نظر آرہے تھے اور اروندر سنگھ لولی کو سننے کے لیے بیتاب تھے۔

کارکنان سے خطاب کرتے ہوئے اروندر سنگھ لولی نے کہا کہ تاریخ گواہ ہے جب جب کانگریس پارٹی نے دوبارہ اقتدار حاصل کرنے کیلئے رفتار پکڑی ہے اور اپنا کھویا ہوا وقار واپس لینے کی لڑائی لڑی ہے تو شمال مشرقی دہلی کے عوام نے بھرپور ساتھ دیا ہے۔ آج کی میٹنگ میں جس تعداد میں کانگریس کارکنان و لیڈران کے علاوہ عام لوگ دکھائی دے رہے ہیں وہ اس بات کی دلیل ہے کہ لوگ بدلاﺅ کا پورا من بنا چکے ہیں۔

دہلی کانگریس صدر نے زور دیتے ہوئے کہا کہ ملک کی راجدھانی دہلی میں جب کانگریس نے واپسی کی ہے تو جمنا پار سے اس کا بگل بجا ہے۔ انہوں نے حوالہ دیتے ہوئے کہا کہ سابق وزیر اعظم آنجہانی اندرا گاندھی جی نے جب ’کانگریس آئی‘ تشکیل دی تو کانگریس پارٹی کی جیت کی شروعات ہاتھی کے نشان پر گاندھی نگر سے ہوئی تھی۔ انہوں نے مزید کہا کہ جب کانگریس آئی کو ہاتھ کا نشان ملا تو گھونڈہ سیٹ سے کانگریس نے فتح کا پرچم لہرایا۔ آج دوبارہ جدوجہد کا سفر جاری ہے اور کانگریس پارٹی اس لیے لڑائی لڑ رہی ہے کہ موجودہ سرکار پورے ہندوستان کی جمہوریت کی بنیادوں کو ہلانے کا کام کر رہی ہے۔ تاہم اس کے خلاف آواز اٹھانے کا وقت آ گیا ہے اور جمناپار سے 3 فروری کو جو آواز بلند ہوگی وہ پورے ملک میں موجودہ حکومت کو ہلانے کا کام کرے گی۔

اروندر سنگھ لولی نے کہا کہ آج جس جگہ سے میں خطاب کر رہا ہوں یہاں کے لوگ میرے خاندان کی طرح ہیں، میں ایم ایل اے بھی رہا اور سرکار میں وزیر بھی۔ کانگریس پارٹی میں رہتے ہوئے ہم نے عوام کیلئے بہت کام کیے ہیں۔ کانگریس کے دور میں لوگ اپنی پریشانی بتاتے تھے اور اس پر فوری کارروائی کی جاتی تھی۔ لیکن آج عوام پریشان ہیں جس کو دیکھتے ہوئے کانگریس پارٹی عوام کے ساتھ کھڑی ہے اور ایک مرتبہ پھر آپ سبھی کو کوششوں سے ہم دہلی میں کانگریس کا پر چم لہرائیں گے۔

اپنی بات کو جاری رکھتے ہوئے لولی نے کہا کہ دہلی میں آبزرور اس لیے تعینات کیے گئے ہیں تاکہ زمینی سطح پر کانگریس پارٹی کو مضبوط کیا جا سکے اس لئے کانگریس کے ایک ایک فرد نے ابھی سے اپنی کمر کس لی ہے۔ کانگریس لیڈر چودھری متین احمد اور سابق ایم ایل اے حسن احمد نے مشترکہ طور پر کہا کہ پچھلے 10 برس میں ہر کس و ناکس نے دوسرے پارٹیوں کو اچھی طرح ان کو اور ان کے کام کو دیکھ لیا ہے۔ وہ اب اس بات کو تسلیم کرنے لگے ہیں کہ ہم سے بھول ہوئی ہے اور کانگریس کو واپس لانا چاہتے ہیں۔ 3 فروری کو منعقد ہونے والی کانگریس کی عظیم ریلی آنے والے لوک سبھا الیکشن کی تیاری کا بگل بجانے کا کام کرے گی۔

بابرپور ضلع کانگریس صدر چودھری زبیر احمد نے کہا کہ شمال مشرقی دہلی میں نوجوانوں کی بڑی تعداد کانگریس پارٹی سے جڑ رہی ہے جس کے مثبت نتائج لوک سبھا الیکشن میں دیکھنے کو ملیں گے۔ انہوں نے مزید کہا کہ کانگریس کارکنان و لیڈران کے علاوہ وہ لوگ بھی ہمارے رابطے میں ہیں جنہوں نے کانگریس سے دوری بنا لی تھی لیکن وہ دوبارہ کانگریس کو اقتدار میں لانا چاہتے ہیں۔