دہلی: کانگریس ترجمان ڈاکٹر نریش کمار نے ’چرواہا‘ کی موت معاملہ میں دہلی پولیس کو بنایا ہدف تنقید

دہلی کے ہرن کودنا گاؤں میں 16 اگست کو ایک مقامی باشندہ کی پانی سے بھرے گڈھے میں گرنے سے موت ہو گئی تھی۔ اس معاملے میں دہلی پردیش کانگریس کمیٹی کے سینئر ترجمان ڈاکٹر نریش کمار نے دہلی پولیس کے رویہ کو تنقید کا نشانہ بنایا ہے۔ بتایا جاتا ہے کہ ہرن کودنا گاؤں میں ایک چرواہا جب بھینس چَرانے جا رہا تھا تو اچانک پانی سے بھرے گڈھے میں گر گیا جس سے اس کی موت ہو گئی۔ یہ معاملہ سامنے آنے کے بعد ڈاکٹر نریش کمار نے متاثرہ کنبہ کو ایک کروڑ روپے معاوضہ دینے کا مطالبہ کیا ہے۔

اس سلسلے میں ڈاکٹر نریش کمار نے آج لیفٹیننٹ گورنر وی کے سکسینہ کو ایک عرضداشت سونپی اور اس کی ایک کاپی وزیر اعلیٰ دفتر کو بھی روانہ کیا۔ اس عرضداشت میں ڈاکٹر نریش نے لکھا ہے کہ ’’آپ کی توجہ ہرن کودنا گاؤں میں میں جمعہ کو پانی کے گڈھے میں ڈوب کر ہلاک شخص کے اہل خانہ کو ایک کروڑ روپے معاوضہ کی رقم دینے کے لیے متوجہ کرنا چاہتا ہوں۔ ہرن کودنا گاؤں میں جمعہ کو بھینس چَرانے گئے ایک شخص کی پانی کے گڈھے میں گرنے سے موت ہو گئی۔ اس معاملے میں دہلی پولیس کا رویہ کافی مایوس کن ہے جس میں کہا گیا ہے کہ وہ شخص وہاں نہانے گیا تھا، جبکہ وہ اپنے مویشی کو چَرانے گیا تھا۔‘‘

ڈاکٹر نریش اس عرضداشت میں یہ بھی لکھتے ہیں کہ ’’اس علاقہ میں ایک بڑا گڈھا تھا جس میں پانی بھر گیا تھا اور مویشی چَرانے گئے ہرن کودنا باشندہ روی ولد کلدیپ کی اس میں ڈوب کر موت ہو گئی ہے۔ اس حادثہ میں لاپروائی کا مظاہرہ کرنے والی شہری ایجنسیوں اور متعلقہ افسران کے خلاف سخت کارروائی کی گزارش کرتا ہوں۔ اس معاملہ میں پولیس نے پلّہ جھاڑتے ہوئے کہا کہ وہ وہاں نہانے گیا تھا، جبکہ وہ خالی پڑی زمین گنگا انٹرنیشنل اسکول کی ہے جس میں وہ گڈھا کھودا گیا تھا۔ اس معاملے میں انتظامیہ لیپا پوتی کر رہی ہے اور قصوروار اشخاص کو بچا رہی ہے۔‘‘