دہلی کے وزیر اعلیٰ اروند کیجریوال کورونا وائرس کے شکار، گھر میں آئسولیٹ

نئی دہلی: دہلی کے وزیر اعلیٰ اروند کیجروال کورونا سے متاثرہ پائے گئے ہیں، انہوں نے خود ٹوئٹ کر کے یہ اطلاع دی ہے، فی الحال وہ آئسولیشن میں ہیں۔

کیجریوال نے ٹوئٹ کیا، ’’مجھے کورونا کا انفیکشن ہوا ہے۔ علامات ہلکی ہیں۔ میں نے فی الحال خود کو گھر میں آئسولیٹ کر لیا ہے۔ جو لوگ گزشتہ کچھ دنوں میں میرے رابطہ میں آئے ہیں وہ خود کو آئسولیٹ کر لیں اور کورونا ٹیسٹ کرا لیں۔‘‘

خیال رہے کہ وزیر اعلیٰ اروند کیجریوال گزشتہ روز اپنی پارٹی کی انتخابی مہم کے سلسلہ میں اتراکھنڈ گئے تھے اور انہوں نے راجدھانی دہرادون میں 'نو پریورتن سبھا' سے خطاب کیا تھا۔ اس سے پہلے اتوار کے روز اروند کیجریوال نے اتر پردیش کی راجدھانی لکھنؤ میں ایک ریلی سے خطاب کیا تھا۔ اتر پردیش اور اتراکھنڈ میں رواں سال اسمبلی انتخابات ہونے والے ہیں۔

دہلی میں یکم جنوری کو کورونا کے 2796 معاملے درج کئے گئے تھے، اس کے بعد 2 جنوری کو معاملوں کی تعداد 3194 تک جا پہنچی اور 3 جنوری کو متاثرین کی تعداد بڑھ کر 4099 ہو گئی۔

کورونا انفیکشن کے معاملوں میں لگاتار اضافہ ہو رہا ہے اور اس سلسلہ میں آج صبح 11 بجے ’ڈی ڈی ایم اے‘ (دہلی ڈیزاسٹر منیجمنٹ اتھارٹی) کی میٹنگ طلب کی گئی ہے۔ اس میٹنگ میں کورونا کی صورتحال کا جائزہ لیا جائے گا۔ دہلی میں گریڈڈ رسپانس ایکشن پلان (جی آر اے پی) کے تحت ’ریڈ الرٹ‘ جاری کیا جا سکتا ہے، جس میں مکمل کرفیو جیسی پابندیاں عائد ہوں گی۔ فی الحال راجدھانی میں جی آر اے پی کا یلو الرٹ ہے۔