دہلی کی ہوا دوبارہ ’بہت خراب‘، کئی علاقوں میں اے کیو آئی 400 سے تجاوز کر گیا

نئی دہلی: دہلی کی فضائی آلودگی مسلسل سنگین صورت حال اختیار کر رہی ہے۔ جمعہ کی صبح 7 بجے دہلی کا 24 گھنٹے کا اوسط ایئر کوالٹی انڈیکس (اے کیو آئی) 371 ریکارڈ کیا گیا۔ دہلی کے بیشتر علاقوں میں دھند اور سموگ کی موٹی چادر نظر آئی اور کئی علاقوں میں اے کیو آئی 400 سے تجاوز کر گیا، جو سنگین کیٹگری میں شمار ہوتا ہے۔

جہانگیرپوری صبح 7 بجے تک 426 اے کیو آئی کے ساتھ سب سے زیادہ آلودہ علاقہ رہا۔ دیگر علاقوں جیسے آنند وہار (408)، بوانا (409)، منڈکا (401)، نہرو نگر (408)، شادی پور (401)، اور وزیر پور (412) میں بھی اے کیو آئی 400 کے پار رہا۔ ان کے علاوہ، زیادہ تر علاقوں میں اے کیو آئی 340 سے 400 کے درمیان ریکارڈ کیا گیا۔

دہلی کے لودھی روڈ کا اے کیو آئی 260 کے ساتھ نسبتا بہتر رہا، جو ’خراب‘ کیٹگری میں آتا ہے۔ سی پی سی بی کے اعداد و شمار کے مطابق، دہلی کے بیشتر علاقے ’بہت خراب‘ کیٹگری میں ہیں۔

ماہرین کے مطابق، ہفتے کے آخر تک ہوا میں معمولی بہتری کا امکان ہے۔ حکومت نے فضائی آلودگی کو کم کرنے کے لیے متعدد اقدامات کیے ہیں اور گریڈڈ ریسپانس ایکشن پلان (گریپ) کا چوتھا مرحلہ بھی نافذ کر دیا گیا ہے۔

عوام کو فضائی آلودگی کی مانیٹرنگ کے لیے قائم مراکز سے معلومات فراہم کی جاتی ہیں۔ یہ مراکز اے کی آئی کی ریڈنگ کے ذریعے آلودگی کی سطح اور صحت پر اثرات سے آگاہ کرتے ہیں۔ اے کیو آئی کا پیمانہ 0 سے 500 کے درمیان ہوتا ہے، جس میں 0-50 کو ’اچھا‘، 51-100 کو ’اطمینان بخش‘، 101-200 کو ’درمیانہ‘، 201-300 کو ’خراب‘، 301-400 کو ’بہت خراب‘، 401-450 کو ’سنگین‘ اور 450 سے اوپر کو ’انتہائی سنگین‘ کیٹگری میں رکھا جاتا ہے۔

حکومت شہریوں کو احتیاطی تدابیر اختیار کرنے کا مشورہ دے رہی ہے، خاص طور پر بزرگوں، بچوں، اور سانس کی بیماریوں میں مبتلا افراد کو گھر کے اندر رہنے کی ہدایت دی گئی ہے۔