گوا: نئی حکومت کی حلف برداری میں مزید تاخیر، کانگریس نے کہا ’فضول خرچی‘ بند کرو

پرمود ساونت اور ان کے کابینہ معاونین کی حلف برداری تقریب 28 مارچ تک کے لیے ملتوی کر دی گئی ہے تاکہ اس پروگرام میں وزیر اعظم نریندر مودی، مرکزی وزیر داخلہ امت شاہ اور بی جے پی کی سرکردہ قیادت کی موجودگی یقینی ہو سکے۔ ریاستی بی جے پی کے ایک افسر نے منگل کے روز یہ جانکاری دی۔ کانگریس رکن اسمبلی یوری الیماؤ نے اس تعلق سے ایک ٹوئٹ کیا ہے جس میں لکھا ہے کہ ’’نریندر مودی، امت شاہ اور بی جے پی لیڈروں کی سہولت سے گوا کے لوگوں کی سہولت زیادہ اہم ہے۔ گوا چاہتا ہے کہ گوا حکومت مکمل طور سے فوراً تشکیل پائے۔ پروگرام مینجمنٹ پر فضول خرچی بند کرو اور راج بھون کے دربار ہال میں فوراً حلف دلاؤ۔‘‘

بی جے پی کے ایک ترجمان نے کہا کہ 28 مارچ کو ایک اِنڈور اسٹیڈیم میں عظیم الشان حلف برداری تقریب ہوگی جس میں بی جے پی کے سرکردہ لیڈران شامل ہوں گے۔ پی ایم مودی کے علاوہ امت شاہ، بی جے پی کے قومی صدر جے پی نڈا اور سات بی جے پی حکمراں ریاستوں کے وزرائے اعلیٰ کے بھی موجود رہنے کی امید ہے۔

گوا میں حکومت بنانے کا دعویٰ پیش کرنے کے فوراً بعد ساونت نے پیر کو مشورہ دیا تھا کہ حلف برداری تقریب میں سرکردہ بی جے پی لیڈروں کے پروگراموں کو منظم کرنے میں تاخیر ہو سکتی ہے۔ واضح رہے کہ گوا میں 20 رکنی بی جے پی قانون ساز پارٹی کو تین آزاد امیدواروں اور مہاراشٹروادی گومانتک پارٹی کے دو اراکین اسمبلی نے حمایت دی ہے۔