دہلی میں اسکول کھولنے پر فیصلہ متوقع، ڈی ڈی ایم اے کا اجلاس طلب

نئی دہلی: راجدھانی دہلی میں کورونا کے کیسز کی کم ہوتی تعداد کے پیش نظر دہلی ڈیزاسٹر مینجمنٹ اتھارٹی (ڈی ڈی ایم اے) آج اسکولوں کو دوبارہ کھولنے پر غور کر سکتی ہے۔ ریاست میں کورونا سے متعلق پابندیوں میں مزید نرمی بھی کی جا سکتی ہے۔’آج تک‘ کی رپورٹ کے مطابق دہلی حکومت کے ایک سینئر افسر نے مطلع کیا ہے کہ ڈی ڈی ایم اے 4 فروری کو دہلی کی صورتحال کا جائزہ لینے اور اسکولوں کو دوبارہ کھولنے اور دیگر پابندیوں نرمی کے حوالہ سے غور و خوض کے لیے میٹنگ منعقد کرے گا۔

سابقہ میٹنگ کے دوران دہلی حکومت نے اسکولوں کو دوبارہ کھولنے کی سفارش کرتے ہوئے کہا تھا کہ بچوں کی تعلیم کے نقصان کو روکنے کے لیے اسکولوں کو شروع کرنا ضروری ہے۔ نائب وزیر اعلیٰ منیش سسودیا نے کہا تھا کہ حکومت نے اسکولوں کو اس وقت بند کر دیا تھا جب یہ بچوں کے لیے محفوظ نہیں تھے، لیکن ’زیادہ احتیاط‘ انہیں نقصان پہنچا رہی تھی۔ انہوں نے مزید کہا تھا کہ آن لائن تعلیم کلاس روم میں درس و تدریس کا مقام نہیں لے سکتی۔

تاہم انفیکشن کی صورتحال کے پیش نظر انتظامیہ نے تعلیمی ادارے کھولنے کی اجازت نہیں دی تاہم آج ہونے والی میٹنگ میں اس کی ہدایت دی جا سکتی ہے۔ خیال رہے کہ فروری کے پہلے ہفتے سے بیشتر ریاستوں میں تعلیمی ادارے کھل چکے ہیں۔ دہلی میں بھی اسکول کھولنے کا مطالبہ کیا جا رہا ہے۔ آج کی میٹنگ کے بعد یہ واضح ہو گا کہ 7 فروری بروز پیر سے اسکول کھل سکیں گے یا انہیں فی الحال بند ہی رکھا جائے گا۔