دہلی میں کل کورونا سے سب سے زیادہ 357 اموات

کورونا وبادہلی میں ایک خوفناک شکل اختیار کرتی جا رہی ہے۔ جہاں کورونا متاثرین کی تعداد 24 ہزار یومیہ سے کم نہیں ہو رہی وہیں اس وبا سے مرنے والوں کی تعداد میں مستقل اضافہ جاری ہے۔ کل دہلی میں اس وبا سے مرنے والوں کی تعداد 357 رہی جبکہ ایک دن پہلے یعنی جمعہ کو یہ تعداد 348 تھی۔

واضح رہے دہلی میں اگر کورونا متاثرین کی شرح کو دیکھا جائے تو اس میں واضح اضافہ نظر آ رہاہے۔ متاثرین کی شرح 32.27 فیصد بنی ہوئی ہے جو ایک تشویشناک پہلو ہے۔ پچھلے کچھ دنوں کےدوران جو اعداد و شمار آئے ہیں اس میں متاثرین کی تعداد ضرور کم نظر آ رہی ہے لیکن شرح فیصد میں کوئی کمی نہیں ہےاور اس کی وجہ جانچ کی تعداد میں کمی بتائی جا رہی ہے ۔

ادھر دہلی کےاسپتالوں سے مستقل آکسیجن کی قلت کی خبریں آرہی ہیں اور بہت سے نجی اسپتالوںمیں آکسیجن کےتعلق سےبہت ہی خراب خبریں موصول ہو رہی ہیں۔ کہیں کچھ گھنٹوں کی آکسیجن بچی ہے تو کہیں آکسیجن کی کمی کی وجہ سےاتنےمریضوں نےدم توڑ دیا ہے۔ دہلی کےوزیر اعلی اروند کیجریوال نےمرکز سےآکسیجن سپلائی کرنےکی درخواست کی ہے۔دہلی کانگریس کےسینئر رہنما اجےماکن نے مرکز اور ریاستی حکومت پر الزام لگاتےہوئےکہا ہے کہ مرکز نے دہلی کو آٹھ آکسیجن پلانٹ لگانےکےلئےکہا تھا لیکن دہلی حکومت نےاس جانب کوئی قدم نہیں اٹھایا۔ انہوں نے کہا کہ دونو ں حکومتیں ایک دوسرے کے اوپر الزام لگا رہی ہیں لیکن دونوں نےاپنے کام سے دہلی کےعوام کو مایوس کیا ہے۔