ملک بھر کی 242 یونیورسٹیوں میں داخلے کے لیے ’سی یو ای ٹی- یو جی‘ امتحانات شروع

نئی دہلی: کامن یونیورسٹی کا داخلہ ٹیسٹ ’سی یو ای ٹی- یو جی‘ اتوار سے ملک بھر میں شروع ہو گئے ہیں۔ یہ امتحانات کل 242 یونیورسٹیوں میں داخلے کے لیے ہو رہے ہیں۔ ان میں ملک بھر کی تمام مرکزی یونیورسٹیاں، کئی نجی، ڈیمڈ اور ریاستی سطح کی یونیورسٹیاں شامل ہیں۔ ان امتحانات کے ذریعے 12ویں جماعت پاس کرنے والے طلباء مختلف انڈرگریجویٹ کورسز کے پہلے سال میں داخلہ حاصل کر سکیں گے۔ امتحانات کے بارے میں مزید تفصیلات دیتے ہوئے، یو جی سی کے چیئرمین پروفیسر ایم جگدیش کمار نے کہا کہ اتوار کو ’سی یو ای ٹی- یو جی‘ کی پہلی شفٹ تمام 271 شہروں اور 447 مراکز میں اچھی طرح سے منعقد کی گئی ہیں۔ پروفیسر کمار کے مطابق، ’سی یو ای ٹی- یو جی‘ کی پہلی شفٹ میں امیدواروں کی کل تعداد 87,879 تھی۔

اہم بات یہ ہے کہ اس سال ’سی یو ای ٹی- یو جی‘  کے لیے 16 لاکھ سے زیادہ طلبہ نے فارم بھرے ہیں۔ ان طلبہ میں سے 14 لاکھ سے زائد طلبہ نے اس کی فیس بھی جمع کرا دی ہے۔ یو جی سی کے مطابق یہ تعداد گزشتہ سال کے مقابلے 41 فیصد زیادہ ہے۔ گزشتہ سال 9.9 لاکھ درخواستیں موصول ہوئی تھیں۔ اس بار درخواستوں کی اتنی بڑی تعداد کی وجہ سے، ’سی یو ای ٹی- یو جی‘  کے امتحانات اب 6 جون تک چلیں گے۔ جبکہ 7 اور 8 جون کو ریزرو تاریخوں کے طور پر رکھا گیا ہے۔ مرکزی یونیورسٹیوں میں نیا تعلیمی سیشن اس سال یکم اگست سے شروع ہوگا۔ امتحان، جو 21 مئی سے شروع ہونا تھے اور صرف 31 مئی تک چلنا تھے۔ یو جی سی اب ان امتحانات کو دو مختلف سیشنوں میں منعقد کرنے جا رہا ہے۔

حالانکہ، نیشنل ٹیسٹنگ ایجنسی (این ٹی اے) نے جموں و کشمیر کے طلباء کے لیے کامن یونیورسٹی انٹری ٹیسٹ ’سی یو ای ٹی- یو جی‘ کو دوبارہ شیڈول کیا ہے۔ یو جی سی کے سربراہ ایم جگدیش کمار کے مطابق، جموں و کشمیر کے مرکز کے زیر انتظام علاقے میں 21 مئی سے 25 مئی تک شیڈول ’سی یو ای ٹی- یو جی‘  امتحانات کو منسوخ کر دیا گیا ہے۔ یہاں یہ امتحانات اب 26 مئی سے شروع ہوں گے۔ سی یو ای ٹی امتحان کا پہلا مرحلہ 21 مئی سے 31 مئی تک منعقد ہو رہا ہے۔ جگدیش کمار کے مطابق دوسرے سیشن کا انعقاد طلبہ کی مشکلات کو کم کرنے کے لیے کیا جا رہا ہے۔ امتحانات کا دوسرا سیشن یکم، 2، 5 اور 6 جون کو ہوگا۔

پچھلے سال 59 ممالک کے طلباء نے ’سی یو ای ٹی- یو جی‘ کے لیے درخواست دی تھی۔ 2023 میں 74 ممالک کے طلباء اس میں شامل ہو رہے ہیں۔ ان میں سے 1000 طلباء کا تعلق یورپ، ایشیا، امریکہ اور خلیجی ممالک سے ہے۔ مجموعی طور پر اس بار امتحان میں شرکت کرنے والے طلبہ کی تعداد میں 4 لاکھ سے زائد کا اضافہ ہوا ہے۔ 2023 میں ’سی یو ای ٹی- یو جی‘  میں شرکت کرنے والے طلباء کی کل تعداد میں 41 فیصد اضافہ ہوا ہے۔ ’سی یو ای ٹی- یو جی‘ کے عمل میں حصہ لینے والی یونیورسٹیوں کی تعداد میں بھی اضافہ دیکھا گیا ہے۔ 2022 میں یہ 90 تھیں لیکن 2023 میں بڑھ کر 242 ہو گئی ہیں۔