’مجرم عناصر سے سخت قوانین کے ذریعے بھی نمٹا جا سکتا ہے‘، بلڈوزر کارروائی کے خلاف مایاوتی کی لب کشائی

نئی دہلی: بی ایس پی سربراہ مایاوتی نے بلڈوزر کی کارروائی پر سپریم کورٹ کے سخت تبصرہ پر ردعمل ظاہر کیا۔ انہوں نے سوشل میڈیا اکاؤنٹ ایکس پر یوپی حکومت پر کئی سوال اٹھائے، اپنی مدت کار کو یاد کیا اور قانونی کارروائی کی وکالت کی۔

بی ایس پی سپریمو نے لکھا، ’’ملک میں جرائم پیشہ عناصر کے خلاف قانون کے مطابق کارروائی کی جانی چاہیے اور ان کے اہل خانہ اور قریبی لوگوں کو ان کے جرائم کی سزا نہیں ملنی چاہیے۔ یہ سب ہماری پارٹی کی حکومت نے 'قانون کے ذریعے قانون کی حکمرانی' (رول آف لا بائی لا) کے ذریعے قائم کر کے بھی دکھایا گیا ہے۔‘‘

انہوں نے مزید لکھا، ’’بلڈوزر کا استعمال بھی عزت مآب سپریم کورٹ کے آنے والے فیصلے کے مطابق ہونا چاہیے، تاہم مناسب ہوگا کہ اسے استعمال کرنے کی ضرورت ہی نہ پڑے کیونکہ جرائم پیشہ عناصر سے بھی سخت قوانین کے تحت نمٹا جا سکتا ہے۔‘‘

اگلی پوسٹ میں انہوں نے پھر بلڈوزر کا ذکر کرتے ہوئے اپنے خیالات کا اظہار کیا۔ انہوں نے کہا کہ جرائم پیشہ عناصر کے اہل خانہ اور رشتہ داروں پر بلڈوزر استعمال کرنے کے بجائے متعلقہ اہلکاروں کے خلاف سخت کارروائی کی جائے جو ایسے عناصر کی ملی بھگت سے متاثرین کو مناسب انصاف نہیں دیتے۔ تمام حکومتوں کو اس طرف توجہ دینی چاہیے۔‘‘

خیال رہے کہ بلڈوزر ایکشن کے معاملے پر سپریم کورٹ نے سخت تبصرہ کیا ہے۔ کیس کی سماعت کرتے ہوئے جسٹس بی آر گوائی کی بنچ نے کہا کہ فوجداری قانون میں ملزمان کے خلاف بلڈوزر کی کارروائی کیسے ہو سکتی ہے؟ عدالت نے کہا ہے کہ اگر کوئی قصوروار ہو تب بھی اس کے خلاف بلڈوزر کی کارروائی نہیں ہو سکتی، یہ قانون کے خلاف ہے۔

دراصل، جمعیۃ علماء ہند نے حال ہی میں یوپی، مدھیہ پردیش اور راجستھان کے واقعات کا حوالہ دیتے ہوئے بلڈوزر کارروائی کے خلاف سپریم کورٹ میں عرضی داخل کی تھی۔ اس درخواست میں جمعیۃ علما ہند نے اقلیتی برادری کو نشانہ بنانے کا الزام لگایا ہے۔ درخواست میں حکومت سے ملزمان کے گھروں پر بلڈوزر چلانے سے روکنے کا مطالبہ کیا گیا ہے۔