' چندہ دو، دھندہ لو ورنہ ای ڈی کا پھندا لو' والی حکومت کی ڈکیتی پکڑی گئی : سی پی آئی (ایم ایل)

کمیونسٹ پارٹی آف انڈیا مارکسی-لینن (سی پی آئی-ایم ایل) کے پولٹ بیورو کے رکن دھیریندر جھا نے کہا کہ ان کی پارٹی اس بار لوک سبھا انتخابات میں مودی حکومت کے الیکٹورل بانڈ گھوٹالہ کا جواب 20 روپے کے کوپن سے دے گی۔

جھا نے ہفتہ کو مالے ضلع دفتر میں ضلع سکریٹری بیدھ ناتھ یادو کی صدارت میں منعقدہ دربھنگہ ضلع کمیٹی کی میٹنگ میں کہا کہ پورے ملک میں لوک سبھا انتخابات کی تیاریاں چل رہی ہیں۔ متھلانچل میں تبدیلی کی لہر ہے اور لوگ جملے باز اور بدعنوان حکومت کو ہٹانے کے لیے پرعزم ہیں۔ دلتوں اور پسماندہ طبقات کا مزاج ایسا ہو گیا ہے کہ وہ ایسی حکومت کو مزید برداشت نہیں کر سکتے جو آئین مخالف، مزدور مخالف ہو، بڑھتی ہوئی مہنگائی اور بے روزگاری کے لیے ذمہ دار ہو۔

سی پی آئی لیڈر نے کہا کہ ' چندہ دو، دھندہ لو ورنہ ای ڈی کا پھندا لو' والی حکومت کی چوری اور ڈکیتی پکڑی گئی ہے۔ اڈانی-امبانی کارپوریٹس کی مودی حکومت اس بار 400 سیٹوں پر ہارے گی۔ یہ خوشی کی بات ہے کہ بھارتیہ جنتا پارٹی (بی جے پی) کے امیدواروں کو ہر گاؤں میں جانے سے روکا جا رہا ہے۔

عوام 10 سال کا حساب مانگ رہے ہیں۔ انہوں نے کہا کہ اس بار انڈیا اتحاد تمام سیٹوں پر جیتے گا اور اس جیت میں سی پی آئی اور بائیں بازو کا بڑا کردار ہوگا۔ سی پی آئی-ایم ایل نے فیصلہ کیا ہے کہ ہم 'ہر گھر چلو' مہم چلائیں گے اور ہر خاندان سے 20 روپے کے عوامی کوپن کا استعمال کرکے بی جے پی کے انتخابی چندہ کے گھوٹالے کو بے نقاب کریں گے۔

سی پی آئی-ایم ایل کے ضلع سکریٹری بیدھ ناتھ یادو نے کہا کہ دربھنگہ میں پارٹی کارکنوں نے بی جے پی کو اقتدار سے بے دخل کرنے کے لیے ہر گاؤں میں مہم شروع کردی ہے۔ انہوں نے بتایا کہ جیوتیبا پھولے کا یوم پیدائش 11 اپریل کو منایا جائے گا۔ اس کے علاوہ 14 اپریل کو بابا صاحب بھیم راؤ امبیڈکر جینتی کے موقع پر ہر گاؤں میں آئین کو بچانے کا عہد لیا جائے گا۔