ہندوستان: کورونا ٹیکہ دینے میں لگیں گے 30 منٹ، ملاحظہ فرمائیں پورے عمل کی تفصیل

کورونا وائرس کو قابو میں کرنے کے لیے ٹیکہ کا انتظار ایسا لگتا ہے کہ جلد ختم ہونے والا ہے۔ یہی وجہ ہے کہ ٹیکہ کاری سے متعلق تیاریاں زور و شور پر ہیں اور ہندوستان میں اس کو لے کر ایک مکمل خاکہ تیار کیا گیا ہے۔ حالانکہ ابھی تک مرکزی حکومت نے کسی بھی ویکسین کے استعمال کو منظوری نہیں دی ہے لیکن بہت جلد کوئی خوشخبری سامنے آ سکتی ہے۔

بہر حال، ہندی نیوز پورٹل ’جن ستّا‘ پر شائع ایک خبر کے مطابق کووڈ-19 ٹیکے پر نیشنل ایکسپرٹ کمیٹی نے ٹیکہ کاری کے لیے ایک خاکہ تیار کیا ہے۔ اس میں فرنٹ لائن ہیلتھ ورکروں کو پہلے ٹیکہ لگایا جائے گا۔ ذرائع کے حوالے سے ’دی انڈین ایکسپریس‘ کی رپورٹ میں کہا گیا ہے کہ ٹیکہ کاری کے لیے ہر سنٹر پر تین الگ الگ کمرے ہوں گے۔ پہلے کمرے میں شخص کو انتظار کرنا ہوگا اور دوسرا کمرہ وہ ہوگا جہاں ٹیکہ لگایا جائے گا۔ اس کے بعد اس شخص کو آبزرویشن روم میں رکھا جائے گا، جہاں اسے 30 منٹ بیٹھنا ہوگا کیونکہ اس مدت کے دوران کچھ منفی رد عمل سامنے آتے ہیں جس پر نظر رکھنا ضروری ہے۔ ذرائع کا کہنا ہے کہ ہر ایک ٹیکہ میں کم از کم 30 منٹ کا وقت لگے گا اس لیے 100-100 لوگوں کے گروپ میں ٹیکہ کاری ہوگی۔