پنجاب: اکالی دل میں گھمسان، باغیوں نے سکھبیر بادل کو ہٹا کر منتخب کیا نیا پارٹی صدر

پنجاب میں منگل کو شرومنی اکالی دل کے ناراض لیڈروں نے لدھیانہ میں ہوئی ایک اہم میٹنگ کی اور راجیہ سبھا رکن پارلیمنٹ سکھدیو سنگھ ڈھینڈسا کو شرومنی اکالی دل کا نیا سربراہ منتخب کر لیا اور سکھبیر سنگھ بادل کو اس سرکردہ عہدہ سے ہٹا دیا۔ ڈھینڈسا کو ان کے بیٹے اور پنجاب کے سابق وزیر مالیات پرمندر سنگھ ڈھینڈسا کے ساتھ مبینہ طور پر پارٹی مخالف سرگرمیوں کے الزام میں اس سال فروری میں بادل نے اکالی دل سے معطل کر دیا تھا۔ بعد میں ڈھینڈسا نے شرومنی اکالی دل (ٹکسالی) سمیت پارٹی سے الگ ہوئے دیگر گروپ کے ساتھ ہاتھ ملا لیا تھا۔

حالانکہ سکھبیر بادل کی قیادت والی شرومنی اکالی دل نے اس قدم کو غیر آئینی اور دھوکہ دہی قرار دیا ہے۔ اکالی دل کے ترجمان اور سینئر لیڈر دلجیت سنگھ چیما نے اس قدم کو غیر قانونی قرار دیتے ہوئے اسے کانگریس کے اشارے پر اٹھایا گیا قدم بتایا ہے۔ چیما نے کہا کہ اکالی دل 100 سال پرانی پارٹی ہے جو ہندوستانی الیکشن کمیشن کے پاس رجسٹرڈ ہے۔ ان کا کہنا ہے کہ جو کچھ ہوا وہ 100 فیصد دھوکہ دہی ہے، یہ غیر قانونی ہے اور جعلسازی ہے۔

غور طلب ہے کہ گزشتہ طویل مدت سے شرومنی اکالی دل میں بادل فیملی کے خلاف بغاوت اٹھتی رہی ہے۔ اس سال فروری میں پارٹی کے راجیہ سبھا رکن پارلیمنٹ اور مشہور لیڈر سکھدیو سنگھ ڈھینڈسا اور ان کے رکن اسمبلی بیٹے نے الزام عائد کیا تھا کہ پارٹی کو غیر جمہوری طریقے سے ایک فیملی کے ذریعہ کنٹرول کیا جا رہا ہے۔ اس کے عبد بادل کی قیادت والی اکالی دل نے دونوں کو پارٹی سے برخواست کر دیا تھا۔ انھیں معطل کرنے سے ایک دن پہلے ہی سابق وزیر اعلیٰ پرکاش سنگھ بادل نے سنگرور شہر میں ڈھینڈسا کے گڑھ میں ایک ریلی کے دوران کہا تھا کہ باپ-بیٹا کی جوڑی نے پارٹی کی پیٹھ میں چھرا گھونپا ہے۔ اس کے علاوہ اکالی دل سربراہ سکھبیر سنگھ بادل نے سکھدیو ڈھینڈسا کو غدار تک کہہ دیا تھا۔

بعد ازاں سکھدیو سنگھ ڈھینڈسا اور لیہرا سے رکن اسمبلی ان کے بیٹے پرمندر سنگھ ڈھینڈسا نے یہ کہتے ہوئے اکالی دل کے سبھی اہم عہدوں سے استعفیٰ دے دیا تھا کہ پارٹی کو جمہوری طریقے سے نہیں چلا جا رہا ہے۔ اب باغی گروپ کے ذریعہ ڈھینڈسا کو پارٹی سربراہ بنائے جانے سے مزید گھمسان کے اشارے مل رہے ہیں۔