مرکز کی حکومت کی نیت اور پالیسیوں کی وجہ سے ملک ٹوٹنے کے دہانے پر: جے رام رمیش

اجین: سابق مرکزی وزیر اور کانگریس کے سینئر لیڈر جے رام رمیش نے آج مرکزی حکومت پر الزام لگاتے ہوئے کہا کہ حکومت کی نیت اور پالیسیوں کی وجہ سے ملک ٹوٹنے کے دہانے پر ہے اور اسی وجہ سے راہل گاندھی کو بھارت جوڑو یاترا نکالنی پڑی۔ اس کے ساتھ ہی انہوں نے بتایا کہ راہل گاندھی 26 جنوری سے پہلے سری نگر میں قومی پرچم لہرائیں گے۔

جے رمیش مدھیہ پردیش کے یاترا کیمپ کے اجین ضلع کے نظر پور میں نامہ نگاروں سے بات چیت کر رہے تھے۔ اس دوران انہوں نے وزیر اعظم نریندر مودی کا نام لیتے ہوئے کہا کہ مرکزی حکومت کی نیت اور پالیسیوں کی وجہ سے ہندوستان کے ٹوٹنے کا خدشہ بڑھتا جا رہا ہے۔ ملک میں سماجی پولرائزیشن ہے، سیاسی آمریت ہے۔ ان کی وجہ سے ہندوستان کے ٹوٹنے کا خدشہ بڑھ گیا ہے اور اسی لیے راہل گاندھی یہ یاترا نکال رہے ہیں۔

اس دوران انہوں نے مرکزی وزیر جیوترادتیہ سندھیا پر بھی حملہ کیا۔ انہوں نے کہا کہ وہ کابینی وزیر بننا چاہتے تھے، اس لیے انہوں نے کانگریس چھوڑ دی۔ راہل گاندھی کی یاترا کے تناظر میں جے رام رمیش نے کہا کہ یہ یاترا 4 دسمبر کی شام کو مدھیہ پردیش سے راجستھان جائے گی۔ یہ راجستھان میں پانچ دسمبر سے شروع ہوگی۔ 19 تاریخ کو الور میں ایک ریلی ہوگی۔ اس کے بعد یاترا ایک یا دو دن ہریانہ میں رہے گی۔

انہوں نے بتایا کہ یاترا 24 دسمبر کی شام تک دہلی پہنچ جائے گی۔ چار پانچ دن یاترا کا آرام رہے گا۔ یاترا میں شامل 60 کنٹینرز کو مرمت کی ضرورت ہے جس میں تین سے چار دن لگ جائیں گے۔ اس کے بعد یہ یاترا اتر پردیش، ہریانہ، پنجاب سے ہوتی ہوئی جموں و کشمیر پہنچے گی۔ جے رام رمیش نے بتایا کہ 26 جنوری سے پہلے راہل گاندھی سری نگر میں قومی پرچم لہرائیں گے۔