کورونا کا خوف، اسپتال سے بھاگنے کی کوشش میں مشتبہ مریض کی موت

ہریانہ کے کرنال شہر میں ایک سرکاری اسپتال کی چھٹی منزل سے گرنے کے سبب کورونا کے مشتبہ مریض کی موت ہو گئی۔ بتایا جاتا ہے کہ 55 سالہ شیو چرن کووڈ-19 کا مشتبہ مریض تھا اور اس کے علاوہ بھی وہ کئی بیماریوں میں مبتلا تھا جس کی وجہ سے یکم اپریل سے اس کا علاج کلپنا چاؤلا میڈیکل کالج کے ایک آئسولیشن وارڈ میں چل رہا تھا۔ کورونا کے خوف میں وہ اس قدر مبتلا ہوا کہ اسپتال سے بھاگنے کا منصوبہ بنایا اور اس کوشش میں ناکام ہو کر اس نے اپنی جان گنوا دی۔

دراصل اسپتال سے فرار ہونے کے لیے اس نے ایک ترکیب نکالی اور کئی بیڈ شیٹس کو باندھ کر ایک رسّی تیار کر لی تاکہ چھٹی منزل سے نیچے لٹک کر اتر سکے۔ جب اس نے ایسا کرنے کے لیے کوشش کی تو چھٹی منزل سے سیدھے نیچے آ گرا جس سے وہ موت کی نیند سو گیا۔ واقعہ کے متعلق ڈپٹی کمشنر نشانت کمار یادو نے میڈیا کو بتایا کہ "پانی پت کے رہنے والے مریض شیو چرن کا آئسولیشن وارڈ میں علاج چل رہا تھا اور چھٹی منزل سے گرنے کی وجہ سے اس کی موت ہو گئی۔"

غور طلب ہے کہ پوری دنیا میں کورونا کی وبا نے تقریباً 13 لاکھ لوگوں کو اپنی زد میں لے لیا ہے اور مہلوکین کی تعداد 60 ہزار کے پار ہو گئی ہے۔ ہندوستان میں بھی کورونا وائرس کا اثر لگاتار بڑھتا جا رہا ہے۔ وزارت صحت کے مطابق پیر یعنی 6 اپریل کی صبح تک کورونا وائرس کی وجہ سے ملک میں 109 افراد کی موت ہو گئی ہے جب کہ کورونا کی زد میں آنے والے مریضوں کی تعداد 4000 سے زائد ہو چکی ہے۔ ان میں تقریباً 3700 ایکٹیو کیسز ہیں جب کہ تقریباً 300 مریض ڈسچارج ہو چکے ہیں۔