کورونا انفیکشن: ہندوستان میں اموات کا نیا ریکارڈ قائم، 24 گھنٹے میں 195 ہلاکتیں

نئی دہلی: ملک بھر میں کورونا وائرس ’كووڈ -19‘ وبا سے متاثرین کی تعداد میں تیزی سے اضافہ ہو رہا ہے اور گزشتہ 24 گھنٹوں کے دوران اس وائرس کے 3900 نئے کیسز سامنے آئے ہیں اور مزید 195 مریضوں کی موت کے بعد ہلاک شدگان کی تعداد بڑھ کر 1568 ہو گئی ہے۔ یہ ہندوستان میں 24 گھنٹے کے اندر اب تک کی سب سے زیادہ ہلاکت ہے۔ اس سے اندازہ ہوتا ہے کہ ہندوستان میں کورونا انفیکشن کا قہر بڑھتا ہی جا رہا ہے۔

ملک کی الگ الگ ریاستوں اور مرکز کے زیر انتظام علاقوں میں کوروناوائرس کے اب تک کل 46433 کیسز کی تصدیق ہوئی ہے جن میں 111 غیر ملکی مریض بھی شامل ہیں۔ کورونا وائرس سے متاثر افراد کے صحت مند ہونے کی رفتار بھی تیز ہوئی ہے اور گزشتہ 24 گھنٹوں میں کورونا وائرس سے متاثر1020 افراد کے صحت مند ہونے کے ساتھ ایسے لوگوں کی تعداد12727 تک پہنچ گئی ہے۔ مرکزی وزارت صحت کی جانب سے منگل کی صبح جاری تازہ ترین اعدادوشمار کے مطابق کورونا وائرس کا پھیلاؤ ملک کی 32 ریاستوں اور مرکز کے زیر انتظام علاقوں میں ہوچکا ہے۔

کورونا وائرس سے سب سے شدید متاثر ریاست مہاراشٹر ہے جہاں حالات مسلسل تشویشناک ہوتے جا رہے ہیں اور گزشتہ چوبیس گھنٹے کے دوران 1567 نئے کیسز کے بعد ریاست میں متاثرین کی تعداد 14541 تک پہنچ گئی ہے اور اس دوران 21 مزید افراد کی موت کے بعد اس وبا سے ہلاک شدگان کی تعداد بڑھ کر 583 ہو گئی ہے۔ وہیں ریاست میں 2465 متاثرمریض ٹھیک ہو چکے ہیں۔

گجرات گزشتہ 24 گھنٹوں کے دوران 376 نئے کیسز سامنے آنے کے ساتھ متاثرین کی تعداد کے معاملہ میں دوسرے مقام پر برقرار ہے۔ گجرات میں متاثرین کی مجموعی تعداد 5804 ہو گئی ہے اور 29 مزید افراد کی موت کے بعد ہلاک شدگان کی تعداد 319 تک پہنچ گئی ہے۔

قومی دارالحکومت دہلی میں بھی حالات تشویشناک بنے ہوئے ہیں اور گزشتہ 24 گھنٹوں میں 349 نئے کیسز درج کیے جانے کے بعد سے اب تک کل 4898 افراد اس وبا سے متاثر ہوئے ہیں۔ دہلی میں اس وبا سے مرنے والوں کی تعداد بڑھ کر64 ہو گئی ہے جبکہ اب تک کل 1431 مریضوں کو علاج کے بعد اسپتال سے چھٹی دے دی گئی ہے۔

وہیں راجستھان میں گزشتہ 24 گھنٹوں کے دوران 175 نئے کیسز سامنے آئے ہیں اور یہ تعداد بڑھ کر 3061 ہو گئی ہے۔ ریاست میں انفیکشن سے چار مزید افراد کی موت کے بعد ہلاک شدگان کی تعداد 77 ہو گئی ہے۔ تمل ناڈو میں 527 نئے کیسز سامنے آئے ہیں اور متاثرہ مریضوں کی تعداد بڑھ کر 3550 ہو گئی ہے اور اب تک 31 افراد کی موت ہو چکی ہے۔ مدھیہ پردیش میں اس وائرس کی زد میں اب تک 2942 افراد متاثر ہو چکے ہیں اور گزشتہ 24 گھنٹوں کے دوران مزید نو متاثرین کی موت کے بعد ہلاک شدگان کی تعداد بڑھ کر 165 ہو گئی ہے۔

ملک کی سب سے بڑی ریاست اتر پردیش میں 121 نئے کیسز سامنے آنے کے بعد متاثرین کی مجموعی تعداد 2766 ہو گئی ہے ۔کورونا سے سات مزید افراد کی موت کے ساتھ ابھی تک ہلاک شدگان افراد کی تعداد 50 ہوگئی ہے۔ وہیں ریاست میں ابھی تک 802 مریضوں کو علاج کے بعد اسپتال سے چھٹی دے دی گئی ہے۔

تلنگانہ میں گزشتہ 24 گھنٹوں کے دوران کورونا وائرس کے تین نئے کیسز سامنے آئے جس سے متاثرین کی مجموعی تعداد بڑھ 1085 ہو گئی اور اب تک کل 29 افراد کی موت ہو چکی ہے۔ کیرالہ میں اس مدت میں ایک بھی نیا کیس سامنے نہیں آیا، ریاست میں متاثرین کی تعداد 500 پر برقرار ہے جبکہ چار افراد کی موت ہو چکی ہے۔

جنوبی ہند کی ریاست آندھرا پردیش میں 1650 اور کرناٹک میں 651 افراد متاثر ہیں اور ان ریاستوں میں بالترتیب 36 اور 27 افراد کی موت ہوچکی ہے۔ مرکز کے زیر انتظام جموں و کشمیر میں متاثرین کی تعداد 726 ہے اور آٹھ افراد ہلاک ہوچکے ہیں۔ اس کے علاوہ پنجاب میں 23، مغربی بنگال میں 133، ہریانہ میں چھ ، بہار میں چار، جھارکھنڈ میں تین اور میگھالیہ، اڑیسہ، ہماچل پردیش اور آسام میں ایک ایک شخص کی موت ہوئی ہے۔