کورونا وائرس: حکومت کی نااہلی کے لیے ہندوستان کو بہت بھاری قیمت چکانی پڑے گی: راہل

نئی دہلی: کورونا وائرس میں مسلسل اضافہ پر نریندرمودی حکومت کو نشانہ بناتے ہوئے کانگریس کے سابق صدر راہل گاندھی نے آج کہا کہ فیصلہ کن اور مؤثر اقدام کرنے میں حکومت کی نااہلی کی بہت بھاری قیمت ملک کو چکانی پڑے گی۔

راہل گاندھی نے ٹوئٹ کرتے ہوئے کہا کہ کورونا وائرس کے بھیانک خطرے سے نمٹنے کے لیے فوری اور جنگی پیمانہ پر کارروائی ضروری ہے ورنہ ہندوستان کو حکومت کی نااہلی کے لیے بہت بھاری قیمت ادا کرنی پڑے گی۔

کانگریس رہنما کا یہ بیان ایسے وقت میں سامنے آیا ہے جب ہندوستان میں اس وائرس سے مبتلا مریضوں کی تعداد بڑھ کر 151 ہوگئی ہے جن میں 25 غیر ملکی ہیں اور تین لوگوں کی دہلی، مہاراشٹر اور کرناٹک میں موت ہوچکی ہے۔

منگل کے روز راہل گاندھی نے کہا تھا کہ ہندوستان کو صرف کوروناوائرس کے لیے ہی نہیں بلکہ آنے والی بھیانک معاشی تباہی کے لیے بھی تیار رہنا چاہیے۔ پی ایم مودی پر سخت نکتہ چینی کرتے ہوئے انھوں نے کہا تھا کہ زبردست معاشی بحران سراٹھائے کھڑا ہے اور وزیراعظم کو اب حقیقت کا سامنا کرنا چاہیے۔

راہل گاندھی نے کہا کہ وہ پہلے سے ہی حکومت کو خبر دار رہنے کے لیے کہہ رہے ہیں مگر کوئی ان کی سن نہیں رہا ہے۔ راہل گاندھی نے پارلیمنٹ کے باہر نامہ نگاروں سے بات چیت کرتے ہوئے کہا تھا کہ ’’مجھے یہ کہتے ہوئے بہت افسوس ہورہاہے کہ ہمارے عوام کو آئندہ چھ ماہ میں جن مصائب کا سامنا ہونے والا ہے اس کا تصور نہیں کیا جاسکتا۔‘‘

کانگریس کے سابق صدر راہل گاندھی کورونا وائرس میں اضافہ اور اس کے معیشت پر منفی اثرات کے حوالہ سے حکومت پر مسلسل حملے کرتے رہے ہیں۔