کورونا سے متعلق پروٹوکول: دہلی کے سرکاری اسکولوں کے اساتذہ ہوائی اڈے پر کئے جائیں گے تعینات

نئی دہلی: عالمی سطح پر بڑھتے ہوئے کورونا کے خوف کے درمیان دہلی کے سرکاری اسکولوں کے اساتذہ کو 15 دنوں کے لیے دہلی کے ہوائی اڈے پر تعینات کرنے کا فیصلہ کیا گیا ہے تاکہ بیرون ملک سے آنے والے مسافروں سے کورونا کو پھیلنے سے روکا جا سکے۔ اساتذہ کو 31 دسمبر سے 15 جنوری تک اضافی عملے کے طور پر تعینات کیا جائے گا۔

ڈسٹرکٹ ڈیزاسٹر مینجمنٹ اتھارٹی (ڈی ڈی ایم اے) کی جانب سے، ڈسٹرکٹ مجسٹریٹ، ویسٹ نے اس سلسلے میں ایک حکم نامہ جاری کیا ہے اور انہیں کووڈ پروٹوکول کو یقینی بنانے کے لیے ایئرپورٹ پر اضافی عملے کے طور پر تعینات کیا ہے۔ حکم نامے کے مطابق، مجموعی طور پر 85 ملازمین جن میں تدریسی اور غیر تدریسی عملہ بھی شامل ہے، کو بیرون ملک سے آنے والے مسافروں کی سہولت کے لیے کورونا پروٹوکول کو یقینی بنانے کے لیے ذمہ داری سونپی گئی ہے۔

موسم سرما کی تعطیلات کے باعث یکم جنوری سے 15 جنوری تک اس عرصے کے دوران سرکاری اسکول بند رہیں گے۔ ریں اثنا، دہلی حکومت نے اپنے تمام ہسپتالوں کو الرٹ کر دیا ہے اور انہیں ہدایت دی ہے کہ وہ مستقبل میں رپورٹ ہونے والے ممکنہ کووِڈ کیسز کے لیے تیاریاں تیز کریں۔

سرکاری اسپتالوں کے لیے عام ادویات کی خریداری اور کسی بھی کوویڈ ایمرجنسی سے نمٹنے کے لیے تیاری کے لیے 104 کروڑ روپے کے بجٹ کو منظوری دی گئی ہے۔ نائب وزیر راعلیٰ منیش سسودیا نے پیر کو محکمہ صحت کے سینئر عہدیداروں کے ساتھ ہسپتالوں کے ڈائریکٹروں اور میڈیکل سپرنٹنڈنٹ کے ساتھ منعقدہ میٹنگ میں اس رقم کو منظوری دی۔