کورونا پازیٹو خاتون نے 2 بچیوں کو دیا جنم، سبھی صحت مند

کورونا وائرس انفیکشن سے ہندوستان بے حال نظر آ رہا ہے۔ روزانہ ہزاروں کی تعداد میں کورونا پازیٹو افراد کی تشخیص ہو رہی ہے اور سینکڑوں کی تعداد میں ہلاکتیں بھی سامنے آ رہی ہیں۔ اس درمیان ہندوستان میں اب تک کئی کورونا پازیٹو حاملہ خواتین نے بخیر و خوبی بچوں کو بھی جنم دیا ہے۔ ایسا ہی ایک معاملہ کرناٹک سے سامنے آیا ہے جہاں کورونا پازیٹو خاتون نے ایک نہیں بلکہ دو بچیوں کو جنم دیا ہے۔

میڈیا ذرائع سے موصولہ اطلاعات کے مطابق کرناٹک کے وجے پورہ واقع ضلع اسپتال میں کورونا انفیکشن کا علاج کرانے والی ایک حاملہ خاتون نے دو بچیوں کو جنم دیا۔ اسپتال کے سرجن ڈاکٹر شرنپا کاٹی نے اس سلسلے میں بتایا کہ ماں اور دونوں بچیاں صحت مند ہیں۔ انھوں نے یہ بھی بتایا کہ ایک بچی کا وزن 2 کلو گرام ہے جب کہ دوسری کا وزن 2.1 کلو گرام ہے۔

قابل ذکر ہے کہ کورونا پازیٹو خاتون نے جن بچیوں کو جنم دیا ہے، ان کا ابھی کورونا ٹیسٹ نہیں ہوا ہے۔ جلد ہی ان کا کورونا ٹیسٹ کرایا جائے گا اور پھر برآمد ریزلٹ کے مطابق ڈاکٹرس آگے کی منصوبہ بندی کریں گے۔ فی الحال ماں اور دونوں بچیاں ڈاکٹروں کی سخت نگرانی میں ہیں۔