لندن سے براستہ دہلی، چنئی پہنچا کورونا سے متاثر مریض

چنئی: برطانیہ میں جان لیوا اور مہلک ترین کورونا وائرس کی نئی شکل سامنے آنے کی اطلاعات کے درمیان منگل کو لندن سے دہلی کے راستے چنئی آنے والے 14 مسافروں میں سے ایک کو کورونا وائرس سے متاثر پایا گیا ہے۔ تمل ناڈو کے ہیلتھ سکریٹری ڈاکٹر جے رادھا کرشنن نے آج صبح ہوائی اڈے پر صحت کی سہولیات کا معائنہ کرنے کے بعد کہا کہ ایک شخص کو کورونا سے متاثر پایا گیا ہے اور اسے کنگ انسٹی ٹیوٹ کے کورونا اسپتال میں داخل کرایا گیا ہے۔

انہوں نے بتایا کہ مسافر کے گلے اور سواب کے نمونے پونے کی لیبارٹری میں بھیجے گئے ہیں تاکہ یہ معلوم کیا جاسکے کہ وہ اس وائرس کی نئی شکل سے متاثر ہے یا نہیں۔ متاثرہ شخص کے ساتھ پہنچنے والے تمام ساتھی مسافروں کی شناخت کرلی گئی ہے اور ان کی بھی جانچ کی جائے گی۔ انہوں نے کہا کہ گزشتہ 10 دنوں میں لندن سے تمل ناڈو کے راستے تریچی، مدورائی، کوئمبٹور اور چنئی ہوائی اڈوں کے راستے یہاں آنے والے تمام مسافروں کی شناخت کی جا رہی ہے تاکہ ان کی جانچ کرائی جاسکے۔

ریاست کے ہیلتھ سکریٹری ڈاکٹر رادھا کرشنن نے کہا کہ یہاں تک کہ اگر مسافروں کی کورونا ٹسٹ کی رپورٹ منفی آئی تو بھی انھیں قرنطین میں رہنے کی صلاح دی جائے گی۔ ہیلتھ سکریٹری نے کہا کہ مرکز نے آج رات آدھی رات سے برطانیہ کی تمام پروازوں پر پابندی عائد کر دی ہے، لیکن ان ریاستوں کی شناخت کی جا رہی ہے جو پہلے ہی مختلف ریاستوں خصوصا بنگلور سے سڑک کے ذریعے ریاست پہنچ چکے ہیں۔ ریاست میں داخل ہونے والے ہر فرد کی جانچ کو یقینی بنانے کے لئے سرحدوں پر نگرانی تیز اور بڑھا دی گئی ہے اور چیک پوائنٹس میں اضافہ کیا گیا ہے۔

وزیر صحت ڈاکٹر سی وجئے بھاسکر نے ایک ٹی وی چینل کو بتایا کہ گزشتہ 10 دنوں میں 1088 مسافر برطانیہ سے آئے تھے ، جن کی شناخت کی جا رہی ہے تاکہ ان کا کورونا ٹسٹ کرایا جاسکے۔ انہوں نے بتایا کہ مسافروں کے ساتھ رابطے میں آنے والے لوگوں کو بھی وائرس کے پھیلاؤ کو روکنے کے لئے سراغ لگائے جار ہے ہیں۔