کورونا بحران: سابق وزیر اعظم منموہن سنگھ نے پی ایم مودی کو لکھا خط

نئی دہلی: سابق وزیراعظم منموہن سنگھ نے کورونا کے معاملات میں اضافہ پر تشویش ظاہر کرتے ہوئے وزیراعظم نریندر مودی کو خط تحریر کرکے کہا کہ وبا کنٹرول کرنے کے لئے ٹیکہ کاری مہم میں تیزی لانا ضروری ہے۔ ڈاکٹر منموہن سنگھ نے اس سلسلہ میں پی ایم مودی کو تحریر کردہ خط میں کہا کہ کورونا کی دوسری لہر زیادہ متاثر کر رہی ہے اس لئے اس وبا سے نپٹنے کے لئے ٹیکہ کاری مہم کو تیز کرنے کی ضرورت ہے۔ انہوں نے اس سلسلہ میں پی ایم مودی کو مشورہ دیا کہ حکومت کو ٹیکہ کاری میں تیزی لانے کے ساتھ ہی اس کی کمی کو دور کرنے کے اقدامات بھی کرنا چاہئیں۔

انہوں نے کہا کہ کورونا کے ٹیکہ کی تیاری بڑھانے کے ساتھ ساتھ پورے ملک میں شفاف طریقہ سے ان کی تقسیم کا انتظام بھی کیا جانا چاہیے اور کورونا ٹیکہ کاری کے لئے مقررہ عمر کی حد میں نرمی دینے کا بندوبست کرنا چاہیے۔ انہوں نے کہاکہ اسکول، استاد، بس ڈرائیور، آٹو ڈرائیور، ٹیکسی ڈرائیور، میونسپل کارپوریشنوں، ایئر پنچایتوں میں کام کرنے والے ملازمین وکیل وغیرہ عام لوگوں کے رابطہ میں زیادہ رہتے ہیں اس لئے ان پیشوں سے منسلک 45 سال سے کم عمر کے لوگوں کو کورونا ٹیکہ لگایا جانا چاہیے۔

سابق وزیراعظم نے کہا کہ حکومت کی پالیسیوں کی وجہ سے ہندوستان آج دنیا میں ٹیکہ کی تیاری کا سب سے بڑا مرکز بنا ہوا ہے۔ ان کا کہنا تھا کہ ٹیکوں کی تیاری کا کام زیادہ ہو اس لئے اس کے مزید لائسنس دیئے جانے چاہئیں او لائسنس دینے کے عمل کی سختی سے پیروی کی جانی چاہیے۔