کوچ بہار: بی جے پی رہنما اننت مہاراج پر سادھو سے مارپیٹ کرنے کا الزام، ناراض لوگوں کا احتجاجی مظاہرہ

 مغربی بنگال کے کوچ بہار میں بی جے پی رہنما کے ذریعہ مار پیٹ کا معاملہ سامنے آیا ہے۔ یہاں بی جے پی کے راجیہ سبھا رکن پارلیمنٹ اننت مہاراج پر آشرم میں گھس کر سادھو کے ساتھ دھکا مکی اور مار پیٹ کرنے کا الزام لگا ہے۔ اس واقعہ کے منظر عام پر آنے کے بعد سیتائی علاقے کے لوگوں میں ناراضگی ہے۔ اس سلسلے میں دیہی لوگوں نے سڑک پر ٹائر جلا کر احتجاجی مظاہرہ کیا اور جم کر نعرے بازی بھی کی۔ انہوں نے وارننگ دی ہے کہ جلد سے جلد اننت مہاراج کو گرفتار کیا جائے ورنہ مظاہرہ جاری رہے گا۔

'آج تک' کی خبر کے مطابق الزام ہے کہ بی جے پی رہنما اننت مہاراج وجئے دشمی یعنی اتوار کی شام سیتائی میں واقع رام کرشن وویکانند آشرم گئے تھے جہاں کسی مذہبی بات چیت کے دوران ان کی سادھو سے کہا سنی ہو گئی۔ پھر دھکا مکی اور مار پیٹ کے بعد اننت مہاراج آشرم سے باہر نکل گئے۔ کہا جاتا ہے کہ اس وقت مہاراج کے ساتھ ان کے کئی معاونین بھی تھے۔

واقعہ کی جانکاری لوگوں کو ملی تو انہوں نے سیتائی-ماتھا بھانگا شاہراہ پر رکاوٹ پیدا کرکے مظاہرہ شروع کر دیا۔ سیتائی تھانہ پولیس نے مظاہرین سے بات چیت کرکے انہیں پُرامن کیا۔

ٹی ایم سی رہنما اور شمالی بنگال کے ترقیات کے وزیر اُدین گُوہا نے واقعہ کی سخت الفاظ میں مذمت کی ہے اور پولیس سے اس معاملے میں مناسب کارروائی کرنے کو کہا ہے۔

وہیں سادھو سے مار پیٹ کے الزام کو بی جے پی ایم پی اننت مہاراج نے مسترد کرتے ہوئے اس طرح کے کسی بھی واقعہ سے صاف انکار کر دیا ہے۔ انہوں نے کہا کہ وہ آشرم جا کر مہاراج کا نام، پہچان اور تعلیمی لیاقت پوچھ رہے تھے تو انہوں نے غصے میں بتانے سے انکار کر دیا۔ اننت مہاراج نے کہا کہ بعد میں سادھو نے کچھ مقامی دیہی لوگوں کو غلط باتیں بتاتے ہوئے گمراہ کر دیا۔ جس کے بعد ان دیہی لوگوں نے مظاہرہ کرنا شروع کر دیا۔