حاجی ملنگ درگاہ کی ’آزادی‘ کے وزیر اعلیٰ شندے کے بیان پر تنازعہ، ٹرسٹی چندرہاس کیتکر نے کہا- ’سیاسی مفاد کے لیے کیا جا رہا دعویٰ!‘

ممبئی: مہاراشٹر کے وزیر اعلی ایکناتھ شندے نے یہ بیان دے کر تنازعہ کھڑا کر دیا ہے کہ وہ صدیوں پرانی حاجی ملنگ شاہ درگاہ کی 'آزادی' کے لیے پرعزم ہیں۔ دائیں بازو کے گروہ اس درگاہ کو مندر ہونے کا دعویٰ کرتے ہیں۔ یہ درگاہ ماتھیران کی پہاڑیوں پر ملنگ گڑھ قلعے کے قریب سطح سمندر سے 3000 فٹ کی بلندی پر واقع ہے۔ یہاں یمن کے 12ویں صدی کے صوفی بزرگ حاجی عبدالرحمٰن کا مزار ہے، جنہیں مقامی لوگ حاجی ملنگ بابا کے نام سے جانتے ہیں۔ یہاں 20 فروری کو حاجی ملنگ کے یوم پیدائش کی خصوصی تیاریاں کی جا رہی ہیں۔

کلیان میں واقع صوفی بزرگ کی آخری آرام گاہ تک پہنچنے کے لیے دو گھنٹے کا سفر طے کرنا پڑتا ہے۔ درگاہ کے ٹرسٹیوں میں سے ایک چندر ہاس کیتکر نے کہا، ’’جو کوئی دعویٰ کر رہا ہے کہ حاجی ملنگ درگاہ ایک مندر ہے، وہ سیاسی فائدے کے لیے ایسا کر رہا ہے۔‘‘ چندر ہاس کیتکر کا خاندان گزشتہ 14 نسلوں سے اس درگاہ کی دیکھ بھال کر رہا ہے۔ 1980 کی دہائی کے وسط میں، مقامی شیوسینا رہنما آنند دیگے نے اس جگہ کو ناتھ فرقے سے تعلق رکھنے والا ایک قدیم ہندو مندر قرار دے کر درگاہ کی مخالفت شروع کی تھی۔

چیف منسٹر ایکناتھ شندے نے تھانے ضلع میں 'ملنگ گڑھ ہرینام مہوتسو' میں اپنے خطاب کے دوران کہا، ’’میں ملنگ گڑھ کے تئیں آپ کے جذبات سے بخوبی واقف ہوں۔ یہ آنند دیگے تھے جنہوں نے ملنگ گڑھ کی آزادی کی تحریک شروع کی، جس سے ہم نے 'جئے ملنگ شری ملنگ' کا نعرہ لگانا شروع کیا۔ تاہم، میں آپ کو بتانا چاہتا ہوں کہ کچھ معاملات ایسے ہیں جن پر عوامی سطح پر بات نہیں کی جاتی۔ میں ملنگ گڑھ کی آزادی کے بارے میں آپ کے گہرے یقین سے واقف ہوں۔ میں آپ کو بتاتا چلوں کہ ایکناتھ شندے اس وقت تک چپ نہیں بیٹھے گا جب تک وہ آپ کی خواہش پوری نہیں کر دیتا۔‘‘

چندرہاس کیتکر کے مطابق، ’’1954 میں، حاجی ملنگ کے انتظام پر کیتکر خاندان کے کنٹرول سے متعلق ایک کیس میں، سپریم کورٹ نے تبصرہ کیا تھا کہ درگاہ ایک جامع ڈھانچہ ہے، جس پر ہندو یا مسلم قانون نہیں چل سکتا۔ یہ صرف اس کے اپنے مخصوص رسم و رواج یا ٹرسٹ کے مقرر کردہ اصولوں کے تحت چل سکتا ہے۔ پارٹیاں اور ان کے رہنما اب اسے صرف اپنے ووٹ بینک کو راغب کرنے اور سیاسی ایشو بنانے کے لیے اٹھا رہے ہیں۔ ہر سال ہزاروں کی تعداد میں عقیدت مند اپنی 'منت' کے ساتھ درگاہ پر آتے ہیں۔‘‘

حاجی ملنگ درگاہ کا تذکرہ 1882 میں شائع ہونے والے بمبئی پریزیڈنسی کے گزیٹیئرز سمیت مختلف تاریخی ریکارڈوں میں ملتا ہے۔ ساخت کا حوالہ دیتے ہوئے، اس میں کہا گیا ہے کہ یہ درگاہ ایک عرب مبلغ حاجی عبدالرحمٰن کے اعزاز میں تعمیر کی گئی تھی، جو حاجی ملنگ کے نام سے مشہور تھے۔ کہا جاتا ہے کہ نل راجہ کے دور میں صوفی بزرگ اپنے بہت سے پیروکاروں کے ساتھ یمن سے آئے اور ماتھیران کی پہاڑیوں کے دامن میں آباد ہو گئے۔‘‘

مقامی داستانوں کا دعویٰ ہے کہ نل راجہ نے اپنی بیٹی کی شادی صوفی بزرگ سے کی تھی۔ بابا حاجی ملنگ اور ماں فاطمہ دونوں کی قبریں درگاہ احاطے کے اندر واقع ہیں۔ بمبئی پریزیڈنسی کے گزیٹرز بتاتے ہیں کہ ڈھانچہ اور مقبرے 12ویں صدی سے موجود ہیں۔ گزٹ میں کہا گیا ہے کہ 18ویں صدی میں اس وقت کے مراٹھا کنفیڈریسی نے کلیان کے ایک برہمن کاشی ناتھ پنت کیتکر کی قیادت میں درگت کو پیشکش بھیجی تھی۔ کیونکہ مقامی لوگوں کا خیال تھا کہ بابا حاجی ملنگ کے اختیارات کی وجہ سے انگریز یہاں سے واپس جانے پر مجبور ہوئے۔