امبیڈکر کا آئین خطرے میں: راہل گاندھی

کانگریس صدر راہل گاندھی نے بھارتیہ جنتا پارٹی (بی جے پی) پر فائدے کے لئے جھوٹ بولنے کا الزام لگاتے ہوئے کہا کہ بابا صاحب امبیڈکر کا آئین خطرے میں ہے۔ دریں اثنا کانگریس پارٹی نے راہل گاندھی کی قیادت میں حکومت مخالف مظاہرہ کیا گیا۔

گاندھی نے پارٹی کے 133 ویں یوم تاسیس کے موقع پر پارٹی ہیڈکوارٹر میں صدر کے طور پر پہلی بار پرچم کشائی کرتے ہوئے کہا کہ بی جے پی کوجہاں فائدہ دکھائی دیتا ہے اور اس کے لئے وہ جھوٹ بولنے سے بھی گریز نہیں کرتی۔ انہوں نے مرکزی وزیر اننت کمار ہیگڑے کے آئین میں تبدیلی سے متعلق بیان پر کہا کہ بابا صاحب امبیڈکر نے ملک کو جو آئین دیا تھا اس پر آج خطرہ منڈلارہا ہے۔

گاندھی نے کہا کہ کانگریس نے ہمیشہ سچائی کی جنگ لڑی ہے اور اس جنگ کو وہ آگے بھی جاری رکھے گی۔ پارٹی ہیڈ کوارٹر میں منعقد اس پروگرام میں گاندھی کے علاوہ سابق وزیر اعظم ڈاکٹر منموہن سنگھ، راجیہ سبھا میں حزب اختلاف کے رہنما غلام نبی آزاد اور دہلی کی سابق وزیر اعلی شیلا دیکشت سمیت کئی بڑے لیڈر موجود تھے۔

کانگریس صدر راہل گاندھی کی قیادت میں پارٹی کے اراکین پارلیمنٹ نے مرکزی وزیر اننت کمار ہیگڑے کے بیان پر احتجاج کیا۔ آئین کے متعلق دیئے گئے بیان کی مخالفت میں پارلیمنٹ کے احاطہ میں مہاتماگاندھی کے مجسمہ کے پاس نعرے بازی کرتے ہوئے کانگریس نے ہیگڑے کو برخاست کرنے کا مطالبہ کیا۔

کانگریس کے مظاہرہ میں راہل گاندھی کے علاوہ لوک سبھا میں پارٹی کے رہنما ملکارجن کھڑگے، راجیہ سبھا میں لیڈر آف اپوزیشن غلام نبی آزاد سمیت متعدد اراکین پارلیمنٹ موجود رہے۔