آئین ریزرویشن، تعلیم اور سانس لینے کی گارنٹی ہے، بی جے پی اسے بدلنے کی بات کرتی ہے: منوج جھا

وزیر اعظم نریندر مودی نے منگل (16 اپریل) کو گیا میں ایک جلسۂ عام میں آئین کو تبدیل کرنے کے اپوزیشن کے الزام کا جواب دیتے ہوئے کہا تھا کہ چاہے بابا صاحب خود آ جائیں، آئین نہیں بدلا جا سکتا۔ اس پر ایک دن بعد ہی یعنی کہ بدھ کو آر جے ڈی کے راجیہ سبھا رکن منوج جھا نے جواب دیتے ہوئے کہا ہے کہ بی جے پی آئین کو تبدیل کرنے کی بات کرتی ہے۔

پٹنہ میں ایک پریس کانفرنس میں انہوں نے کہا کہ آئین صرف کاغذ کا ایک ورق نہیں ہے بلکہ یہ ایک زندہ دستاویز ہے۔ انہوں نے کہا، ’’آئین ریزرویشن، تعلیم اور سانس لینے کی گارنٹی ہے، آپ اس آئین کو تبدیل کرنے کی بات کر رہے ہیں، یہ محض صفحات نہیں بلکہ زندہ دستاویز ہیں۔‘‘

منوج جھا نے آئین کو تبدیل کرنے کی بات پر بی جے پی پر تنقید کی اور کہا کہ وہ آئین کو تبدیل کرنے کی بات کرتے ہیں۔ جھا نے کہا کہ آئین میں ترمیم ہو سکتی ہے، آپ اسے تبدیل نہیں کر سکتے۔ انہوں نے کہا کہ موہن بھاگوت نے 9 سال پہلے آئین پر نظرثانی کی بات کی تھی۔ یہ لوگ ریزرویشن ختم کرنے جا رہے ہیں۔ راجیہ سبھا کے رکن نے کہا کہ اگر یہ آئین نہیں رہے گا تو ملک نہیں رہے گا۔

آر جے ڈی کے لیڈر نے زور دے کر کہا کہ کچھ لوگ جو الیکشن لڑ رہے ہیں ہر روز کہتے ہیں کہ ہم آئین بدلیں گے۔ آپ کہتے ہیں کہ آپ آئین کو تبدیل کرنا چاہتے ہیں۔ آئین کیا ہے؟ یہ ریزرویشن کی گارنٹی ہے، تعلیم کی گارنٹی ہے، روزگار کی گارنٹی ہے۔ یہ آئین آپ کے بنیادی حقوق کا احترام کرتے ہوئے ترقی کی راہ پر سب کو ساتھ لے کر چلنے کا ضامن ہے۔ انہوں نے مزید کہا کہ وزیر اعظم مودی بڑی گارنٹی دے رہے ہیں، وہ اپنے لوگوں کو سمجھائیں۔