کانگریس کی ’مہنگائی ہٹاؤ مہا ریلی‘، جے پور کی سڑکوں پر لوگوں کا سیلاب...گراؤنڈ رپورٹ

جے پور: کانگریس پارٹی نے راجستھان سے مہنگائی کے خلاف اعلان جنگ کر دیا ہے۔ پارٹی کی جانب سے آج جے پور کے ودیادھر نگر اسٹیڈیم میں ’مہنگائی ہٹاؤ مہاریلی‘ کا انعقاد کیا گیا ہے۔ اس مہاریلی میں بڑی تعداد میں لوگوں کی شرکت سے معلوم ہوتا ہے کہ لوگ مہنگائی سے کس قدر پریشان ہیں اور اس سے مرکزی حکومت کی نیند اڑ سکتی ہے۔ کانگریس کے اجلاس میں سردی کے موسم میں چھٹی ہونے کے باوجود بڑی تعداد میں لوگ شریک ہو رہے ہیں۔ یہاں موجود لوگوں کے چہروں پر زبردست غصہ نظر آ رہا ہے۔ لوگ کانگریس کے حق میں نعرے لگا رہے ہیں، اس سے پیغام جاتا ہے کہ لوگوں میں مہنگائی کے خلاف ناراضگی بڑھتی جا رہی۔

جس راستہ سے ہم آئے ہیں پولیس والوں کا کہنا تھا کہ جہاں آگے والی گاڑیاں جا رہی ہیں ان کے پیچھے پیچھے چلے جائیں اسٹیڈیم تک پہنچ جائیں گے۔ یوں محسوس ہوتا تھا کہ ہر سڑک اسٹیڈیم کی جانب جا رہی ہے۔ چاروں طرف سے لوگ اسٹیڈیم میں داخل ہونے کی کوشش کر رہے ہیں۔ پولیس اور سیوا دل کے رضاکاروں کو لوگوں کی بڑی تعداد ہونے کی وجہ سے کافی مشقت کرنا پڑ رہی ہے اور مزید لوگوں کے پہنچنے کا سلسلہ لگاتار جاری ہے۔

اسٹیڈیم کے اندر دو اسٹیج بنے ہوئے ہیں جن میں سے ایک پر لکھا ہوا ہے ’مہنگائی کے خلاف جنگ‘ دوسرے پر لکھا ہے ’مہنگائی ہٹاؤ دیش بچاؤ‘۔ راہل گاندھی، پرینکا گاندھی سمیت دوسرے لیڈر یہاں کے اسٹیج سے خطاب کریں گے۔

ودیادھر اسٹیڈیم پر راہل گاندھی، سونیا گاندھی اور پرینکا گاندھی کے بڑے بڑے کٹ آؤٹس نصب کئے گئے ہیں اور علاقائی انداز میں لوگ یہاں پہنچنے والوں کا استقبال کیا جا رہا ہے۔ دریں اثنا، یہاں کورونا کا بھی یہاں پورا خیال رکھا گیا ہے۔ پہنچانے والوں کو سینی ٹائیزر اور ماسک فراہم کئے جا رہے ہیں اور کورونا سے متعلق پروٹول پر پوری طرح عمل کیا جا رہا ہے۔