دہلی حکومت کی مافیاؤں سے ملی بھگت کے سبب شراب بیچنے پر پھر سے 25 فیصد کی چھوٹ

دہلی میں شراب کو لے کر ایک بار پھر سیاست شروع ہو گئی ہے۔ عام آدمی پارٹی (عآپ) پر شراب مافیاؤں کے ساتھ مل کر شراب بیچنے کا کانگریس نے الزام عائد کیا ہے۔ کانگریس کے مطابق یہ نشے کی راجدھانی بنانے والے کیجریوال کی شراب مافیا سے ملی بھگت کا ہی نتیجہ ہے۔

ریاستی کانگریس صدر انل کمار نے کہا کہ دہلی حکومت نے اب دہلی میں شراب کی سبھی دکانوں پر شراب بیچنے پر 25 فیصد کی چھوٹ دینے کا حکم جاری کر دیا ہے۔ جب کہ کووڈ گائیڈلائنس اور زبردست بھیڑ و ٹریفک جام کے سبب فروری میں دہلی ہائی کورٹ نے شراب بیچنے پر چھوٹ و ایک کے ساتھ ایک مفت بیچنے پر روک لگا دی تھی۔

چودھری انل کمار نے کہا کہ ’’کیجریوال نوراتروں میں شراب بیچنے پر 25 فیصد کی چھوٹ دے کر لوگوں کے مذہبی جذبات کو ٹھیس پہنچا رہے ہیں۔ نئی ایکسائز پالیسی کے بعد دہلی میں سرکاری شراب کی دکانیں بند کروا کر 849 پرائیویٹ کمپنیوں کو دکانیں الاٹ کرنا بدعنوانی ہے۔‘‘ دراصل دہلی حکومت کے محکمہ آبکاری نے شراب بیچنے والی پرائیویٹ دکانوں کو ایم آر پی پر 25 فیصد قیمت تک کی چھوٹ دینے کی منظوری دے دی ہے۔