کے سی وینو گوپال کے خلاف جھوٹی خبریں پھیلانے پر کانگریس کا قانونی کارروائی کا انتباہ

آل انڈیا کانگریس کمیٹی کے جنرل سکریٹری کے سی وینوگوپال کے بارے میں سوشل میڈیا پر جھوٹی خبریں پھیلائی جا رہی ہیں۔ کانگریس نے اسے ایک سازش کا حصہ قرار دیتے ہوئے سوشل میڈیا اور آن لائن طور پر سرگرم دائیں بازو کے لوگوں کی سخت مذمت کی ہے۔ کانگریس نے اپنے لیڈر کے خلاف جھوٹی خبریں پھیلانے والوں کے خلاف قانونی چارہ جوئی کا بھی انتباہ دیا ہے۔

خبروں میں دعویٰ کیا گیا ہے کہ کے سی وینوگوپال نے 27 جولائی کو اپنے حلقہ انتخاب الپّوزا میں ایک بینک ملازمین کی یونین کے زیر اہتمام ایک تقریب میں شرکت کی تھی۔ اس تقریب میں مبینہ طور پر پاکستان کے سابق صدر پرویز مشرف کا نام ان اہم شخصیات کی فہرست میں شامل تھا جنہیں خراج عقیدت پیش کیا جانا تھا۔ اتوار (28 جولائی) کو سوشل میڈیا پلیٹ فارم ’ایکس‘ پر ایک پوسٹ میں کیرالہ پردیش کانگریس نے اس پروپیگنڈے کے پیچھے ایک بڑی سازش کا الزام لگایا ہے۔ پارٹی نے واضح کیا ہے کہ وینوگوپال نے پروگرام میں شرکت نہیں کی اور ان کے بارے میں جھوٹی خبریں پھیلانے والوں کے خلاف قانونی کارروائی کی جائے گی۔

کیرالہ کانگریس کے ذریعے ’ایکس‘ پر کی گئی پوسٹ میں کہا گیا ہے کہ بینک آف انڈیا اسٹاف یونین کچھ دیگر اہم شخصیات کے ساتھ اپنے حلقے کے مطابق کے سی وینوگوپال کو بھی پروگرام کے لیے مدعو کیا تھا۔ جب انہیں اس پروگرام کی نوعیت سے متعلق علم ہوا تو انہوں نے اس میں شرکت نہیں کی۔ پوسٹ میں کہا گیا ہے کہ کانگریس کے پاس اس پروپیگنڈے کے پیچھے ایک بڑی سازش کے بارے میں ٹھوس معلومات ہیں۔

کانگریس پارٹی نے انتباہ دیا ہے کہ جو لوگ یہ جھوٹی خبریں پھیلا رہے ہیں کہ کے سی وینو گوپال اس پروگرام میں شریک ہوئے تھے، انہیں قانونی کارروائی کا سامنا کرنا پڑے گا۔ اس معاملے پر تنازعہ ہونے پر پروگرام کو منعقد کرنے والی یونین نے مبینہ طور پر اسے پرنٹ کی غلطی بتایا تھا اور فوراً اس کو درست کرتے ہوئے پروگرام سے مشرف کا نام ہٹا دیا تھا۔