جھارکھنڈ میں کانگریس اپنا قلعہ مضبوط کرنے میں مصروف، دو سابق ریاستی صدور کی گھر واپسی

جھارکھنڈ میں کانگریس ان دنوں اپنا قلعہ مضبوط کرنے میں مصروف دکھائی دے رہی ہے۔ اسی کوشش کے تحت پیر کے روز کانگریس نے گزشتہ اسمبلی انتخاب میں پارٹی چھوڑنے والے دو قدآور لیڈروں سکھدیو بھگت اور پردیپ بلموچو کو ایک بار پھر سے پارٹی میں شامل کرایا۔ گزشتہ اسمبلی انتخاب کے دوران ان دونوں نے پارٹی چھوڑ دی تھی۔ سکھدیو بھگت جہاں بی جے پی میں شامل ہو گئے تھے، وہیں پردیپ بلموچو آجسو پارٹی میں چلے گئے تھے۔

ریاستی کانگریس انچارج اویناش پانڈے نے ریاستی دفتر میں منعقد ایک تقریب میں ان دونوں لیڈروں کی گھر واپسی کا اعلان کیا۔ سکھدیو بھگت اور پردیپ بلموچو دونوں سابق رکن اسمبلی ہیں اور دونوں ہی جھارکھنڈ ریاستی کانگریس کے صدر رہ چکے ہیں۔ دونوں کو ہی ریاست میں کانگریس کا قدآور لیڈر تصور کیا جاتا رہا ہے۔

جھارکھنڈ کانگریس کے نو تقرر انچارج اویناش پانڈے نے اس موقع پر کہا کہ پارٹی کے مضبوط اور ایماندار سپاہی رہے دونوں لیڈروں نے اعتراف کیا ہے کہ گزشتہ انتخاب کے دوران ان سے بھول ہوئی تھی۔ دونوں کو اپنے فیصلے پر ندامت ہے۔ کانگریس کی قومی صدر سونیا گاندھی اور پارٹی لیڈر راہل گاندھی کی رضامندی کے بعد ان کی گھر واپسی ہوئی ہے۔ ان کے پارٹی میں دوبارہ آنے سے ریاست میں کانگریس کو مضبوطی ملے گی۔

کانگریس میں شامل ہوئے دونوں لیڈروں نے یہ بھی کہا کہ وہ آخری سانس تک اب کانگریسی رہیں گے اور پارٹی کو مضبوط کرنے کے مشن میں لگیں گے۔ اس موقع پر جھارکھنڈ ریاستی کانگریس صدر راجیش ٹھاکر، سابق مرکزی وزیر سبودھ کانت سہائے، کانگریس کے شمال مشرقی ریاستوں کے انچارج ڈاکٹر اجے کمار سمیت جھارکھنڈ حکومت میں شامل کئی کانگریسی وزیر بھی موجود رہے۔