میگھالیہ: کانگریس کا حکومت سازی کا دعوی، گورنر کو خط سونپا

کانگریس کے جنرل سکریٹری سی پی جوشی اور میگھالیہ کانگریس کے صدر ونسینٹ پالا نے دیر رات گورنر گنگا پرساد سے ملاقات کی اور حکومت سازی کا دعویٰ پیش کر دیا۔ کانگریس کی طرف سے گورنر کو خط سونپ دیا گیا ہے جس کے مطابق میگھالیہ میں کانگریس سب سے بڑی پارٹی بن کر ابھری ہے اس لئے اسے دستور کے مطابق جلد حکومت سازی کی دعوت ملنی چاہئے۔ کانگریس کا دعوی ہے کہ وہ طے شدہ مدت میں اسمبلی میں اپنی اکثریت ثابت کر دیگی۔

کانگریس کو میگھالیہ میں 21 سیٹیں حاصل ہوئی ہیں اور پارٹی لیڈران نہیں چاہتے کہ وہاں بھی گوا اور منی پور کی طرح بی جے پی جوڑ توڑ کر کے حکومت بنا لے۔

ایک طرف جہاں جوشی اور پالا نے گورنر سے ملاقات کی تو دوسری طرف خصوصی طور پر میگھالیہ بھیجے گئے قدآور رہنما احمد پٹیل، کمل ناتھ اور مکل واسنک دیگر پارٹیوں کی حمایت حاصل کرنے کے لئے نمائندگان سے مذاکرات میں مصروف ہیں۔

میڈیا رپورٹوں کے مطابق کمل ناتھ نے کہا کہ ہم نے گورنر کو خط سونپ دیا ہے جس میں کانگریس کو حکومت سازی کے لئے دعوت دینے کا مطالبہ کیا گیا ہے۔ انہوں نے کہا کہ انتخابی نتائج کے بعد کانگریس سب سے بڑی پارٹی بن کر آئی ہے اور دوسری پارٹیوں سے بھی بات چیت کی جا رہی ہے۔ کمل ناتھ کے مطابق کانگریس میگھالیہ میں حکومت سازی کے حوالہ سے پوری طرح مطمئن ہے۔

میگھالیہ کی 60 سیٹوں والی اسمبلی میں کانگریس اکثرت سے تھوڑا پیچھے رہ گئی۔ اسے 21 سیٹیں حاصل ہوئی جبکہ اکثریت کے لئے 31 سیٹیں درکار ہیں ۔ نیشنل پیپلز پارٹی (این پی پی ) کو 19 سیٹیں حاصل ہوئی ہیں۔ این پی پی نے بی جے پی سے علیحدہ چناؤ لڑا تھا لیکن وہ بی جے پی سے اتحاد کر کانگریس کو اقتدار سے باہر کر سکتی ہے۔ نارتھ ایسٹ ڈیموکریٹک الائنز (این ای ڈی اے)میں این پی پی اور بی جے پی اتحادی ہیں۔ بی جے پی کو 2 سیٹیں حاصل ہوئی ہیں اور وہ اتحاد کے لئے تیار نظر آ رہے ہیں۔