اسمبلی انتخابات کے پیش نظر 4 ریاستوں کے لیے کانگریس کی اسکریننگ کمیٹیاں قائم، اجے ماکن کو ملی ہریانہ کی ذمہ داری

نئی دہلی: کانگریس پارٹی کی جانب سے آئندہ اسمبلی انتخابات کی تیاری زور و شور سے کی جا رہی ہے۔ اس ضمن میں پارٹی نے 4 ریاستوں ہریانہ، مہاراشٹر، جھارکھنڈ اور جموں اور کشمیر کے لئے اسکریننگ کمیٹیاں تشکیل دی ہیں۔ اجے ماکن کو ہریانہ اسمبلی انتخابات کے لیے کمیٹی کا چیئرمین بنایا گیا ہے۔ ہریانہ کے لئے تشکیل دی گئی کمیٹی میں اجے ماکن کے علاوہ مانیکم ٹیگور، جگنیش میوانی اور سرینواس بیوی کو ارکان کی حیثیت سے شامل کیا گیا ہے۔

ہریانہ کے علاوہ کانگریس ہائی کمان نے مہاراشٹر، جھارکھنڈ اور جموں و کشمیر کے لیے بھی اسکریننگ کمیٹیاں تشکیل دی ہیں۔ پارٹی نے مدھوسودن مستری کو مہاراشٹر میں کمیٹی کا چیئرمین بنایا ہے۔ اس کے علاوہ سپتاگری شنکر الکا، منصور علی خان اور شریویلا پرساد کو کمیٹی کا رکن بنایا گیا ہے۔

اسی طرح جھارکھنڈ اسمبلی انتخابات کے لیے کانگریس کی طرف سے بنائی گئی اسکریننگ کمیٹی میں گریش چوڈانکر کو چیئرمین بنایا گیا ہے۔ ان کے ساتھ پونم پاسوان اور پرکاش جوشی کو بھی کمیٹی کا رکن بنایا گیا ہے۔ وہیں، جموں و کشمیر میں کانگریس لیڈر سکھجندر سنگھ رندھاوا کو اسکریننگ کمیٹی کا چیئرمین بنایا گیا ہے۔ ان کے علاوہ انٹو انٹونی اور سچن راؤ کو اس کمیٹی میں رکن بنایا گیا ہے۔