راہل گاندھی کا سیلاب زدہ کیرالہ کا دورہ، متاثرین سے ملاقات

کانگریس صدر راہل گاندھی آج سے کیرالہ کے دو روزہ دورے پر پہنچے ہیں۔ منگل کی صبح راہل گاندھی ترویندرم پہنچے جہاں کانگریس کے رکن پارلیمنٹ ششی تھرور سمیت دیگر رہنماؤں نے ان کا استقبال کیا۔ راہل گاندھی نے متعدد سیلاب زدہ علاقوں کا دورہ کیا اور سیلاب زدگان سے ملاقات کرکے ان کا حال بھی جانا۔

کیرالہ پہنچنے کے بعد راہل گاندھی نے ٹوئٹ کیا کہ کیرالہ سیلاب کے بعد دو طرح کے نظریہ سامنے آرہے ہیں۔ ایک وہ ہیں جو ہمیشہ متاثرین کی مدد کرتے ہیں اور دوسرے وہ ہیں جو متاثرین کی مدد نہ کر کے نفرت پھیلاتے ہیں۔ راہل گاندھی دیر سے کیرالہ آنے کے لئے معذرت کرتے ہوئے کہا، ’’پچھلی بار جب میں یہاں آیا تھا تو سائیکلون کا اثر تھا۔ جس طرح کی یہاں پر مدد دی گئی اس سے میں خوش نہیں ہوں۔‘‘

واضح رہے کہ کیرالہ ان دنوں صدی کی سب سبے بڑی تباہی سے دو چار ہے۔ سیلاب کی وجہ سے پورے صوبہ کی ہزاروں ایکڑ کھیتی کی زمین تباہ ہو چکی ہے جبکہ ہزاروں گھر منہدم ہو گئے ہیں۔

کانگریس صدر راہل گاندھی مرکزی حکومت سے کیرالہ کے سیلاب کو قومی آفت قرار دینے کا مطالبہ کر چکے ہیں۔ راہل گاندھی نے اس معاملہ پر وزیر اعظم نریندر مودی پر نشانہ بھی لگایا تھا، انہوں نے کہا کہ وزیر اعظم کیرالہ کے ساتھ امتیازی سلوک کر رہے ہیں۔

کیرالہ دورے پر روانہ ہونے سے قبل راہل گاندھی نے ٹوئٹ کر کے کہا تھا ’’میں منگل اور بدھ کو کیرالہ میں رہوں گا۔ سیلاب زدہ علاقوں کا دورہ کروں گا، راحت کیمپوں میں جاؤں گا اور ماہی گیروں اور ضرورت مندگان کی بے لوث مدد کر رہی تنظیموں و دیگر لوگوں سے ملاقات کروں گا۔‘‘