ریڈ کی دھمکی سے کانگریس ڈرنے والی نہیں: سرجے والا

جے پور: کانگریس کے قومی ترجمان رندیپ سنگھ سرجے والا نے مرکز کی مودی حکومت پر جانچ ایجنسیوں کا غلط استعمال کرنے کا الزام لگاتے ہوئے کہا کہ ریڈ کی دھمکی سے کانگریس ڈرنے والی نہیں ہے۔ سرجے والا نے آج یہاں پریس کانفرنس میں کہا کہ مرکزی حکومت جانچ ایجنسیوں کا غلط استعمال کررہی ہے اور وزیراعظم نریندر مودی ریڈ راج پیدا کیے ہوئے ہیں، لیکن اس سے کانگریس ڈرنے والی نہیں ہے۔

انہوں نے کہا کہ بی جے پی اس وقت بوکھلائی ہوئی ہے اور وہ خوف پیدا کرنے کے لئے ای ڈی کی کارروائی کررہی ہے۔ انہوں نے کہا کہ پہلے رکن اسمبلی کرشنا پونیا سے سی بی آئی سے پوچھ گچھ کرائی گئی اور اب آج جودھ پور میں وزیراعلی اشوک گہلوت کے بڑے بھائی اگرسین گہلوت کے گھر میں ای ڈی ریڈ کر رہی ہے۔

انہوں نے کہا کہ اگرسین گہلوت کا قصورصرف اتنا ہے کہ وہ وزیراعلی کے بھائی ہیں۔ وہ نہ تو سیاست میں ہیں اور نہ ہی ان کا سیاست سے کوئی سروکار ہے۔ انہوں نے کہا کہ ان کے گھر پر سینٹرل آرمس فورس تعینات کردی گئی ہے اور ای ڈی ریڈ کر رہی ہے، لیکن ریڈ راج سے راجستھان ڈرنے والا نہیں ہے۔

انہوں نے کہا کہ سب جانتے ہیں کہ مودی حکومت کانگریس میں خوف پیدا کرنے کے لئے اس طرح کی کارروائی کر رہی ہے۔ انہوں نے الزام لگاتے ہوئے کہا کہ بی جے پی جب بھی بحران میں ہوتی ہے وہ سی بی آئی، ای ڈی اور انکم ٹیکس کی کارروائی کرواتی ہے۔