’بی جے پی کے تکبر کو کسان کا ٹریکٹر چکناچور کر دے گا‘، ہستناپور میں پرینکا گاندھی کا روڈ شو

اتر پردیش اسمبلی انتخاب میں کامیابی کے لیے کانگریس اپنا پورا زور صرف کر رہی ہے۔ کانگریس جنرل سکریٹری پرینکا گاندھی اور کانگریس کے سینئر لیڈر لگاتار ریاست میں کانگریس امیدواروں کی حمایت میں روڈ شو کر رہے ہیں۔ کانگریس کو اس روڈ شو کی حمایت بھی حاصل ہو رہی ہے۔ ان سب کے درمیان پرینکا گاندھی ٹریکٹر پر سوار ہو کر لوگوں کے درمیان پہنچ رہی ہیں۔ خصوصاً جن خاتون امیدواروں کو کانگریس نے میدان میں اتارا ہے، ان کی حمایت میں کانگریس لیڈر پرینکا گاندھی خوب انتخابی تشہیر کر رہی ہیں۔

پرینکا گاندھی کی ایک ٹریکٹر پر سوار ایسی ہی تصویر یوپی کے ہستناپور سے سامنے آئی ہے۔ وہاں ان کے ساتھ راجستھان کے سابق نائب وزیر اعلیٰ سچن پائلٹ بھی موجود تھے۔ واضح رہے کہ دونوں کانگریس امیدوار ارچنا گوتم کے لیے ووٹ مانگنے ہستناپور پہنچے ہوئے ہیں۔ کانگریس کو اس ٹریکٹر ریلی کو عوام کی حمایت بھی ملی اور لوگوں کا ہجوم امنڈتا ہوا نظر آیا۔

پہلے مرحلہ کے انتخاب کو دیکھتے ہوئے انتخابی تشہیر کے آخری دن کانگریس کی قومی جنرل سکریٹری پرینکا گاندھی کے ساتھ اسٹار کمپینر سچن پائلٹ بھی خوب محنت کرتے ہوئے نظر آئے۔ کانگریس کے روڈ شو کے دوران حامیوں کا ہجوم پرینکا گاندھی اور سچن پائلٹ سے ہاتھ ملانے کے لیے بے تاب نظر آیا۔ کانگریس نے اپنے ٹوئٹر ہینڈل سے ان تصویروں کو شیئر کرتے ہوئے بی جے پی کو تنقید کا نشانہ بھی بنایا ہے۔ کانگریس نے ٹوئٹ میں لکھا ہے ’’کانگریس جنرل سکریٹری پرینکا گاندھی جی اور راجستھان کے سابق نائب وزیر اعلیٰ سچن پائلٹ نے ہستنا پور میں کانگریس امیدوار کے لیے ووٹ مانگے۔ کسان کا ٹریکٹر بھاجپائی تکبر کو چکناچور کرنے کے لیے تیار ہے۔‘‘