کانگریس لیڈر چودھری متین احمد اور چودھری زبیر احمد کو تیسرے دن بھی پولیس نے کیا نظر بند

نئی دہلی: کانگریس کے قدآور لیڈر اور سیلم پور کے سابق رکن اسمبلی چودھری متین احمد اور بابر پور ضلع کانگریس کمیٹی کے صدر چودھری زبیر احمد کو تین دن سے پولیس نے نظر بند کیا ہوا ہے۔ جمعرات کے روز صبح 8 بجے متین احمد اور زبیر احمد اپنے حامیوں کے ساتھ گزشتہ روز کانگریس ہیڈکواٹر پر ہوئی پولیس کی بربرتا کے خلاف لیفٹیننٹ گورنر ہاؤس (راج نواس) کا گھیراؤ کرنے جا رہے تھے کہ اچانک جعفرآباد پولیس تھانہ کے ایڈیشنل ایس ایچ او شیلیندر اپنی پوری ٹیم کے ساتھ متین احمد کی رہائش گاہ پر پہنچ گئے اور ان کو نظر بند (ہاؤس اریسٹ)کر دیا۔

اس پورے معاملے پر سخت ناراضگی کا اظہار کرتے ہوئے چودھری متین احمد نے قومی آواز کے نمائندہ سے بات کرتے ہوئے کہا کہ بی جی پی کا مسلسل کانگریس لیڈران کو احتجاج میں جانے سے روکنا یہ ثابت کر رہا ہے کہ بی جے پی راہل گاندھی سے خوف زدہ ہے۔ انہوں نے کہا کہ پولیس کے ذریعے کانگریس ہیڈکواٹر پر کی گئی کارروائی کے پاداش میں آج ہماری ٹیم ایل جی ہاؤس کا گھیراؤ کرنے نکل ہی رہی تھی کہ جعفرآباد پولیس تھانے کے ایڈیشنل ایس ایچ او نے اپنی پوری طاقت کا استعمال کرتے ہوئے ہمیں جانے سے روک دیا اور کوئی وجہ بھی نہیں بتائی نہ ہی کوئی آرڈر دکھایا۔ پولیس کا کہنا ہے کہ ہمیں اوپر سے آرڈر ہے کہ آپ کو کسی بھی احتجاج میں جانے نہ دیا جائے۔

انہوں نے کہا کہ بی جے پی کے خوف کا یہ عالم ہے کہ وہ پولیس کو آگے کرکے مارچ اور مظاہرہ کرنے سے ہمیں روک رہی ہے جبکہ ہمارا آئین اپنی آواز اٹھانے کا ہمیں پورا حق دیتا ہے۔ انہوں نے مزید کہا کہ ہمیں آج ہاؤس اریسٹ کر دیا مگر کانگریس کا ایک ایک سپاہی راہل گاندھی کے ساتھ ہے۔

چودھری زبیر احمد نے کہا کہ بی جے پی برطانوی حکومت کے راستے پر چل پڑی ہے، 75 سال میں کبھی بھی ایسا نہیں ہوا کہ ایک نیشنل پارٹی کے دفتر میں داخل ہوکر پولیس نے اس طرح کی بربرتا کا مظاہرہ کیا ہو۔ انہوں نے کہا کہ ایسا لگتا ہے کہ ہم انگریزوں کے دور حکومت میں آگئے ہیں بی جے پی لگاتار ہماری آواز کو دبانے پر تلی ہوئی ہے لیکن بی جے پی بھول گئی ہے کہ ہم عدم تشدد کے پیروکار مہاتما گاندھی کے نظریات پر چلنے والے لوگ ہیں۔

انہوں نے کہا کہ آج بابرپور ضلع کانگريس کمیٹی دہلی پردیش کانگریس کمیٹی کے صدر چودھری انل کمار کی ایما پر اپنے لیڈر راہل گاندھی کی حمایت میں ایل جی ہاؤس جانے کے لئے روانہ ہو نے والے تھے کہ تقریبآ 40 سے زائد پولیس اہلکار نے ہمیں جانے سے روکا اور گلی بند کر دی، زبير نے مزید کہا کہ ہم کانگريس کے سچے سپاہی ہیں اور اپنے لیڈر راہل گاندھی کے لیے اپنی جان کا نذرانہ پیش کر دیں گے لیکن بی جے پی کی سازش کو کسی بھی قیمت پر کامیاب نہیں ہونے دیں گے۔

چودھری متین احمد اور چودھری زبیر احمد کے ساتھ نظر بند ہونے والوں میں دہلی پردیش کانگریس کمیٹی کے ڈیلی گیٹ سید ناصر جاوید، محمد اسماعیل، جرّار احمد، خالد خان، ریاست ساحل، حاجی محمد ہارون، محمد علی، ریاض الدین راجو، شفیق خان مینو، راجیو شرما، اجے شرما، رئیس سلمانی، پروین وستو کے نام قابل ذکر ہیں۔