’پہلی اکتوبر کو پہلے پہر میں ہی بی جے پی کی وداعی...‘، ہریانہ اسمبلی انتخاب کے اعلان پر سرجے والا کا بیان

ہریانہ میں اسمبلی انتخاب کی تاریخ کا اعلان ہو چکا ہے۔ اس ریاست میں یکم اکتوبر کو سبھی 90 اسمبلی سیٹوں کے لیے ووٹ ڈالے جائیں گے۔ جمعہ کے روز الیشکن کمیشن نے اس تعلق سے تفصیلی جانکاری ایک پریس کانفرنس کے ذریعہ دی۔ چیف الیکشن کمشنر راجیو کمار نے بتایا کہ ووٹوں کی گنتی 4 اکتوبر کو ہوگی، یعنی نتائج 4 اکتوبر کو برآمد ہو جائیں گے۔

اس درمیان کانگریس نے اپنے ایک بیان میں کہا کہ اسمبلی انتخاب کی تاریخوں کا اعلان ہونے کے ساتھ ہی ہریانہ کا انتظار پورا ہونے جا رہا ہے، یہاں کانگریس کی حکومت آ رہی ہے۔ کانگریس جنرل سکریٹری رندیپ سنگھ سرجے والا نے سوشل میڈیا پلیٹ فارم ’ایکس‘ پر آئندہ اسمبلی انتخاب میں موجودہ حکومت کی وداعی کا دعویٰ کیا ہے۔ انھوں نے لکھا ہے کہ ’’پہلی اکتوبر کو، پہلے پہر میں ہی بی جے پی کی وداعی پر عوام کی مہر لگ جائے گی۔ عوام کے مینڈیٹ سے دھوکہ دے کر بنی بی جے پی کی حکومت نے شکونی کے چوسر کی طرح پھانس کر ہریانہ کو چوطرفہ چوپٹ کرنے کا گناہ کیا ہے۔‘‘

اس پوسٹ میں رندیپ سنگھ سرجے والا آگے لکھتے ہیں کہ ’’بی جے پی کے ڈبل انجن نے ایک طرف ہریانہ کے کسانوں کو اپنے کھیت کھلیان چھوڑ کر بار بار انصاف کی اپیل کے لیے دہلی کے دروازے پر دستک دینے کو مجبور کر دیا، اور دوسری طرف لاٹھی ڈنڈے، کیل کانٹے سے مزین اپنے سارے سخت نظام کو جھونک کر ہر دن ان کی آواز دبانے، تحریک کو نقصان پہنچانے اور سازشیں تیار کرنے میں پوری طاقت لگا دی۔ لیکن جن کا ڈی این اے ہی کسان مخالف ہے، انھوں نے کسانوں کی شہادت کے بعد بھی ایم ایس پی پر دھوکہ ہی دیا۔‘‘

سرجے والا نے ’اگنی پتھ‘ اسکیم کا تذکرہ بھی اپنے پوسٹ میں کیا۔ انھوں نے لکھا کہ ’’ہریانہ کے نوجوانوں سے فوج میں جانے کا خواب چھین کر، انھیں بے روزگاری کے ’اگنی پتھ‘ پر دھکیل دیا اور مودی جی کے چہیتے، بی جے پی لیڈر برج بھوشن شرن سنگھ کی ناانصافی کے خلاف آواز اٹھاتی ہریانہ کی پہلوان بیٹیوں کو دہلی پولیس سے سڑکوں پر گھسیٹوایا اور پٹوایا۔‘‘ وہ مزید لکھتے ہیں کہ ’’نقل مافیاؤں اور پیپر لیک کے سرغناؤں کی دہشت ایسی ہے کہ ہریانہ میں ایک بھی بھرتی امتحان ٹھیک سے ہونا مشکل رہا۔‘‘

سرجے والا نے بی جے پی کے ساتھ ساتھ جے جے پی کو بھی ہریانہ کی بدحالی کے لیے ذمہ دار ٹھہرایا۔ انھوں نے کہا کہ ’’بی جے پی-جے جے پی کی ’پرچی اور خرچی‘ والی حکومت نے بھرتی کے نام پر نوجوانوں کو صرف دھوکہ دیا اور خوب اُگاہی کی۔ جو ہریانہ خوشحالی کی پہچان رہا، اسے بی جے پی-جے جے پی کی حکومت نے جرائم پیشوں کا اڈہ بنا دیا۔ اکثر مجرمانہ واقعات ہریانہ کے ہر علاقے سے سرخیاں بنتی رہیں۔‘‘ آئندہ اسمبلی انتخاب میں کانگریس کے بہتر امکانات کا دعویٰ کرتے ہوئے انھوں نے کہا کہ ’’ہریانہ کی عوام نے اب بی جے پی کے پردے کے پیچھے کا چھپا کھیل بھی سمجھ لیا۔ اس بار سارا حساب برابر ہوگا۔ ہریانہ کی عوام اب بی جے پی کے ہر دھوکے، بدعنوانی، ناانصافی اور مظالم کا جواب دینے جا رہی ہے۔ اب ’کانگریس کا ہاتھ‘ اور ’ہریانہ کا ساتھ‘ م کر ریاست کو پھر سے خوشحالی اور ترقی کے راستے پر لے کر جانے کو تیار ہے۔‘‘ آخر میں وہ یہ بھی لکھتے ہیں کہ ’’یکم اکتوبر کو ووٹنگ اور 4 اکتوبر کے نتیجوں کا انتظار ہے۔ اب کی بار ہریانہ میں آ رہی، پھر سے کانگریس کی سرکار ہے۔‘‘