کانگریس نے اودے بھانو چِب کو انڈین یوتھ کانگریس کا نیا صدر مقرر کیا

نئی دہلی: انڈین نیشنل کانگریس نے اتوار کو سرینواس بی وی کی جگہ اودے بھانو چِب کو انڈین یوتھ کانگریس (آئی وائی سی) کا نیا صدر مقرر کیا۔ اودے بھانو چِب، جو پہلے آئی وائی سی کے جنرل سکریٹری کے طور پر خدمات انجام دے رہے تھے، اب صدر کے طور پر نوجوانوں کے مسائل پر کام جاری رکھیں گے۔ چِب اس سے پہلے جموں و کشمیر یوتھ کانگریس کے صدر بھی رہ چکے ہیں۔

کانگریس کے صدر ملکارجن کھڑگے نے ایک بیان میں کہا کہ انہوں نے فوری طور پر چِب کو یہ ذمہ داری سونپی ہے، ساتھ ہی انہوں نے سرینواس بی وی کے کام کی تعریف کی۔ سرینواس 5 سال سے زیادہ وقت تک اس عہدے پر رہ چکے تھے اور ان کی مدت کار کے دوران نوجوانوں کے کئی مسائل پر زبردست مظاہرے اور کام ہوا۔

چِب نے حال ہی میں سماجی رابطے کی ویب سائٹ پر لوک سبھا میں اپوزیشن لیڈر راہل گاندھی کے ساتھ اپنی ایک یادگار تصویر شیئر کی اور لکھا تھا، ’’آپ کی سماجی انصاف کے لئے جدوجہد اور عزم ہم سب کے لئے ایک تحریک ہے۔‘‘ چب جموں کے پلورا کے رہائشی ہیں اور کانگریس کے رہنما ہری سنگھ چِب کے بیٹے ہیں۔

خیال رہے کہ سری نواس پانچ سال سے زیادہ عرصے تک انڈین یوتھ کانگریس کے صدر رہے۔ ان کا دور یوتھ کانگریس کے لیے کئی اونچائیوں سے بھرا ہوا تھا کیونکہ ان کے دور میں تنظیم سڑکوں پر نکلی اور نوجوانوں کے بہت سے مسائل پر بھرپور مظاہرہ کیا۔ یہاں تک کہ کوویڈ وبائی مرض کے دوران بھی ان کا امدادی کام میڈیا میں بحث کا بڑا موضوع رہا۔