مغربی بنگال: شہریت ترمیمی ایکٹ کے خلاف کانگریس اور بایاں محاذ کا مشترکہ جلوس

سبودھ ملک اسکوائر سے یہ ریلی شروع ہوکر مہاجاتی سدن پر جاکر ختم ہوا۔ اس موقع پر کانگریس کے ریاستی صدر سومن مترا نے کہا کہ شہریت ترمیمی ایکٹ اور این آر سی پر مرکزی حکومت کنفیوزن کا شکار ہے۔ ایک طرف وزیرا عظم نریندر مودی ہیں جو کہہ رہے ہیں ملک میں این آر سی پر کوئی بات چیت نہیں ہوئی ہے تو دوسری امت شاہ ہیں جو ملک کے وزیر داخلہ ہیں بار بار ملک بھر میں این آر سی نافذ کرنے کی بات کرتے ہیں۔ انہوں نے کہا کہ شہریت ترمیمی ایکٹ اور این آر سی کو الگ کرکے نہیں دیکھا جا سکتا ہے۔

سومن مترا نے کہا کہ بنگال میں خود امت شاہ کہہ چکے ہیں پہلے شہری ترمیمی ایکٹ لایا جائے گا اس کے بعد این آر سی کو نافذ کیا جائے گا۔ امت شاہ نے کہا تھا کہ این آر سی میں جن لوگوں کے نام نہیں آئیں گے تو ہندو، سکھ، بدھشٹ، عیسائی اور جینیوں کو ہندوستانی شہریت اس قانون کے تحت دے دی جائے گی اور باقی لوگوں کو نکال دیا جائے گا۔ سومن مترا نے کہا کہ مرکزی حکومت ملک کے آئین و دستور کے منافی کام کر رہی ہے۔

خیال رہے کہ وزیرا علیٰ ممتا بنرجی نے کانگریس اور بایاں محاذ کو مشترکہ طور پر شہریت ترمیمی ایکٹ کے خلاف تحریک میں حصہ لینے کی دعوت دی تھی مگر بایاں محاذ اور کانگریس نے اس پر توجہ نہیں دی۔ اس جلوس میں بایاں محاذ کے چیر مین بمان بوس، سی پی ایم کے ریاستی سکریٹری سوریہ کانت مشرا، سوجب چکرورتی، محمد سلیم، کانگریس کے راجیہ سبھا رکن پردیپ بھٹاچاریہ شریک تھے۔

بایاں محاذ نے 8 جنوری کو ملک بھر میں صنعتی ہڑتال کا اعلان کر رکھا ہے۔ کانگریس نے بھی اس کی حمایت کی ہے۔ اس ہڑتال کی حمایت میں کانگریس اور بایاں محاذ کے لیڈران مہم چلائیں گے۔ دونوں جماعتیں بنگال میں پہلی مرتبہ بی جے پی کے خلاف جلوس نکال رہے ہیں۔ شہریت ترمیمی ایکٹ کے خلاف ممتا بنرجی پانچ مختلف علاقوں سے جلوس نکال چکی ہیں مگر کانگریس اور بایاں محاذ نے پہلی مرتبہ مشترکہ ریلی نکالی ہے۔