مسلمانوں میں یکجہتی اور اتحاد کے مقصد سے اتحاد ملت کانفرنس کا انعقاد

ملک کے موجودہ حالات کے پیش نظر ممبئی میں علمائے کرام کی ایک بڑی اتحاد ملت کانفرنس کا انعقاد آج یعنی اتوار کو شمال مشرقی ممبئی کے گھونڈی علاقے میں کیا جائے گا ۔ایک عرصے بعدیہ پہلا موقع ہے کہ اس کانفرنس میں شہر، بیرون شہر اور ریاستی سطح کے علمائے کرام شرکت کریں گے، جن کا تعلق سبھی مسلک سے ہوگا۔اس بات کااظہار کیا کہ اتحاد ملت ، علمائے کرام کی ذمہ داریاں ہے۔ مذکورہ کانفرنس کی صدارتصوفی محمد اشفاق قادری کریں گے اور مہمان خصوصی مقامی ایم ایل اے ابوعاصم اعظمی ہوں گے۔اس کا اظہار ایک پریس کانفرنس میں مولانا محمد سلمان خوشتر حلیمی صدر آل انڈیا ملی کونسل نے کیا جن کی قیادت میں اجلاس منعقد ہوگا۔

انہوں نے مطلع کیا کہ مذکورہ کانفرنس میں تمام مکاتب فکر کے علمائے کرام اور عوام شرکت کریں جبکہ کانفرنس کامقصد تمام مکتب فکر کے درمیان اتحاد کو مضبوط بنانا ہے جوکہ ملک کے موجودہ حالات میں انتہائی ضروری ہے۔

اس موقع پر اجلاس کے کنوینر مولاناغفران قاسمی نے صحافیوں سے گفتگو کرتے ہوئے کہاکہ ملکی سطح پر اتحاد ملت کی کوشش کی جانی چاہیئے تاکہ باطل طاقتوں کو ناکام کیاجاسکے۔اس سلسلہ میں گلی محلوں میں کوشش کی جائے گی۔انہوں نے اس خیال کو مسترد کیاکہ ریاستی انتخابات کے مدنظر یہ اقدام کیا جارہاہے۔پریس کانفرنس میں مولانارشید احمد ندوی ،جنرل سکریٹری انجمن اہل السنہ والجماعہ ممبئی نے بتایاکہ ممبئی کا شمال مشرقی علاقہ گوونڈی اور بیگن واڑی مسلم گنجان آبادی ہے اور سبھی مسلک سے وابستہ لوگ آباد ہیں جبکہ یہاں سے ملک بھر میں اتفاق کاپیغام پہنچے گا۔