کسانوں کی خراب حالت کے لئے بی جے پی حکومت ذمہ دار : اکھلیش

سماج وادی پارٹی کے صدر اور سابق وزیر اعلی اکھلیش یادو نے بی جے پی پر حملہ کرتے ہوئے کہا ہے کہ کسان کی خراب حالت کے لئے بھارتیہ جنتا پارٹی حکومت ذمہ دار ہے ۔

اکھیلیش یادو نے ایک بیان میں کہا ہے کہ کسان مخالف پالیسیوں کی وجہ سے ان کی حالت معاشی طور پر کمزور ہوگئی ہے۔ ایک سال قبل کالے زرعی قوانین سے بی جے پی نے جو کالی بنیاد رکھی اس نے پوری زرعی معیشت کو تباہ کردیا ہے۔ اس کے خلاف احتجاج میں کسانوں کی ایک بڑی تحریک چل رہی ہے ۔ آج بھی کسان کا غصہ ختم نہیں ہوا ہے۔ انہوں نے کہا کہ کسانوں کا اتحاد بی جے پی کاغرور چکناچور کردے گا ۔

انہوں نے کہا کہ دوگنی آمدنی کا خواب دکھا کرکسانوں کا ووٹ حاصل کرنے والی بی جے پی حکومت میں کسانوں کو فصلوں کی اصل قیمت نہیں ملی ہے۔ کسانوں کو گمراہ کرنے کے لئے ایم ایس پی کا راگ تو بی جے پی نے خوب الاپا لیکن حقیقت میں کسانوں کی فصلوں کی خریداری ایم ایس پی پر نہیں ہوئی۔

گندم کا ایم ایس پی 1975 روپے فی کوئنٹل صرف اشتہارات میں ہی دستیاب ہے ، حقیقت میں توکسان کو بچولیوں کے ہاتھوں گندم فروخت کرنی پڑی ۔ اس سے پہلے دھان کی فصل میں بھی کسان کی لوٹ ہوئی ۔