دہلی میں کورونا کا پھیلاؤ روکنے کے لئے مکمل لاک ڈاون ضروری: اجے ماکن

نئی دہلی: کانگریس نے دہلی کے وزیراعلی اروند کیجریوال کے کورونا انفیکشن کو پھیلنے سے روکنے کے لئے بازاروں کو محدود طورپر بند کرنے کی پالیسی کو غلط قرار دیتے ہوئے کہا کہ اس سے وبا رکنے کے بجائے مزید پھیلے گی اس لئے بازاروں کو مکمل طورپر بند کیا جانا چاہئے۔

کانگریس کے ترجمان اجے ماکن نے منگل کو یہاں پریس کانفرنس میں کہا کہ جزوی طورپر بازار بند کرنے کی بجائے مکمل لاک ڈاون کیا جانا چاہئے۔ اسی طرح سے میٹرو بھی محدود طور پر نہیں چلائی جانی چاہئے۔

انہوں نے کہا کہ اس پالیسی سے بھیڑ ایک جگہ شفٹ ہو جائے گی اور کورونا کنٹرول ہونے کے بجائے مزید پھیلے گا۔ ایسا کرنے سے لوگ ایک ہی جگہ خریداری کے لئے زیادہ تعداد میں پہنچیں گے۔ اسی طرح سے اگر میٹرو کا آپریشن بھی محدود ہوتا ہے تو اس میں بھی بھیڑ بڑھے گی اور کورونا زیادہ پھیلے گا۔

ماکن نے کہا کہ پورے ملک میں کورونا وائرس کی وجہ سے مرنے والے پانچ لوگوں میں سے ایک دہلی کا ہوتا ہے۔ دہلی میں کوروناکے مریضوں کی تعداد ملک میں سب سے زیادہ ہے۔ آج جو حالات ہیں اس کے حساب سے دہلی میں آئی سی یو بیڈ بہت کم ہیں۔ کیجریوال نے دیوالی کے اشتہار ات پر 32 کروڑ روپے خرچ کئے اگر اس پیسے کا استعمال کورونا کو روکے لئے ہوتا اور اسپتالوں کی تعداد میں اضافہ کیا جاتا تو وبا پر لگام لگائی جا سکتی تھی۔

قبل ازیں، دہلی کے وزیر اعلیٰ کیجریوال نے کہا کہ ریاستی حکومت نے مرکزی حکومت کو ایک تجویز بھیجی ہے جس میں محدود سطح پر پھر سے لاک ڈاؤن لگانے کی اجازت طلب کی گئی ہے۔ اگر اس تجویز پر منظوری مل جاتی ہے تو زيادہ انفیکشن والے علاقوں میں پھر سے تالا بندی کی جاسکتی ہے۔

وزیر اعلی نے کہا کہ کچھ بازاروں میں دیوالی کے تہوار کے دوران بہت لاپرواہی سامنے آئی۔ بازار آنے والے لوگوں نے نہ تو ماسک پہن رکھے تھے، نہ ہی سماجی دوری کی پابندی کی تھی۔

انہوں نے کہا کہ اگر بازاروں میں ماسک پہننے اور معاشرتی فاصلے کے اصولوں پر عمل نہیں کیا جاتا ہے اور وہ جگہ ایک کورونا وائرس کی ہاٹ اسپاٹ بن سکتی ہے تو ان بازاروں کو پھر سے محدود وقفے کے لیے بند کرنے کی اجازت دی جائے ۔ اس طرح کی تجویز مرکز کو بھیجی جا رہی ہے۔

شادی کی تقریبات میں مہمانوں کی تعداد 200 تک رکھنے کی اجازت تھی لیکن کورونا وائرس کے بڑھتے ہوئے معاملوں کے پیش نظر ان کی تعداد 50 تک محدودکرنے کی تجویز لیفٹیننٹ گورنر کو ارسال کر دی گئی ہے۔

قابل ذکر ہے کہ دہلی کے وزیر صحت ستیندر جین نے ایک روز قبل ہی کہا تھا کہ پھر سے لاک ڈاؤن کرنے کا کوئی ارادہ نہیں ہے۔