تبلیغی جماعت مرکز سے کمبھ میلہ کا موازنہ ٹھیک نہیں: وزیر اعلیٰ تیرتھ سنگھ

کورونا وائرس وبا کے درمیان اتراکھنڈ کے ہریدوار میں منعقد کمبھ میلہ تنازعہ کا شکار بن گیا ہے۔ کئی سماجی لیڈران و فلمی ہستیوں نے شاہی اسنان میں جمع ہوئی بھیڑ کے خلاف آواز اٹھائی ہے اور اسے کورونا گائیڈ لائن کی کھلی خلاف ورزی قرار دیا ہے۔ کچھ لوگوں نے تو یہ سوال بھی اٹھایا ہے کہ تبلیغی جماعت مرکز کے خلاف بولنے والے لوگ کمبھ میلہ میں جمع ہونے والی لاکھوں کی بھیڑ کے خلاف آواز کیوں نہیں اٹھا رہے ہیں۔ اس پورے معاملے پر اب اتراکھنڈ کے وزیر اعلیٰ تیرتھ سنگھ راوت کا بیان سامنے آیا ہے۔ انھوں نے کہا ہے کہ مرکز سے کمبھ میلہ کا موازنہ مناسب نہیں کیونکہ کمبھ میلہ پر ماں گنگا کا آشیرواد ہے اور یہاں سے کورونا نہیں پھیلے گا۔

تیرتھ سنگھ راوت نے اپنے بیان میں یہ بھی کہا کہ تبلیغی جماعت مرکز میں کورونا اس لیے پھیلا کیونکہ لوگ بند کمرے میں پروگرام کر رہے تھے، لیکن کمبھ میلہ کھلی ہوا میں منعقد ہوا ہے جہاں سے کورونا پھیلنے کا خطرہ نہیں ہے۔ انھوں نے مزید کہا کہ ماں گنگا کی دھارا بہتی رہتی ہے، ماں گنگا کا آشیرواد لے کر لوگ جائیں گے تو کورونا نہیں پھیلے گا۔

واضح رہے کہ پیر کے روز آئی جی سنجے گنجیال نے بتایا تھا کہ لوگوں سے لگاتار کووڈ ضابطوں پر عمل کرنے کی اپیل کی جا رہی ہے، لیکن زبردست بھیڑ کے سبب چالان جاری کرنا ممکن نہیں۔ گھاٹوں پر سوشل ڈسٹنسنگ پر عمل یقینی بنانا بہت مشکل ہے، اگر اس پر عمل کرایا گیا تو بھگدڑ جیسی حالت ہو سکتی ہے۔