کشمیر میں سردی کی لہر جاری، گلمرگ اور پہلگام سرد ترین مقامات

سری نگر: حالیہ برف باری اور بارشوں کے بعد وادی کشمیر میں سردی کی شدت میں بتدریج اضافہ درج ہو رہا ہے جس نے لوگوں کو گونا گوں مشکلات سے دوچار کر دیا ہے۔ ادھر محکمہ موسمیات کے ایک ترجمان کی پیش گوئی کے مطابق وادی میں 2 نومبر تک موسم مجموعی طور پر خشک رہنے کا امکان ہے۔

انہوں نے بتایا کہ مشہور زمانہ سیاحتی مقامات گلمرگ اور پہلگام وادی کشمیر کے سرد ترین مقامات رہے جہاں کم سے کم درجہ حرارت بالترتیب منفی 1.4 ڈگری سینٹی گریڈ اور منفی 1.1 ڈگری سینٹی گریڈ ریکارڈ کیا گیا۔ گلمرگ میں دوران شب 0.4 ملی میٹر بارش بھی ریکارڈ کی گئی۔

سری نگر میں کم سے کم درجہ حرارت4.2 ڈگری سینٹی گریڈ ریکارڈ کیا گیا جو گزشتہ شب کے کم سے کم درجہ حرارت سے زائد از 3.0 ڈگری سینٹی گریڈ کم تھا۔ سری نگر میں بھی دوران شب ہلکی بارش ہوئی۔ سرحدی ضلع کپوارہ میں کم سے کم درجہ حرارت 2.4 ڈگری سینٹی گریڈ ریکارڈ کیا گیا، جبکہ گزشتہ شب کا کم سے کم درجہ حرارت 2.8 ڈگری سینٹی گریڈ ریکارڈ کیا گیا تھا۔ گیٹ وے آف کشمیر سے جانے والے قصبہ قاضی گنڈ میں کم سے کم درجہ حرارت 6.2 ڈگری سینٹی گریڈ ریکارڈ کیا گیا۔

دریں اثنا وادی میں بدھ کے روز موسم خشک رہا اور ہلکی دھوپ بھی چھائی رہی جس سے لوگوں کو پارکوں اور دکان کے تھڑوں پر لطف اندوز ہوتے ہوئے دیکھا گیا۔ لوگوں کا کہنا ہے کہ حالیہ برف باری اور بارشوں کے بعد موسم سرما کے آغاز سے قبل ہی سرما جیسی سردی شروع ہوگئی ہے۔ انہوں نے کہا کہ ماہ اکتوبر میں ہی گرم لباس اور گرمی کے آلات کا استعمال کرنا پڑ رہا ہے۔ ان کا الزام تھا کہ بھاری برف باری سے قبل ہی بجلی کی آنکھ مچولی بھی شروع ہوگئی ہے جس سے مشکلات مزید بڑھ گئے ہیں۔