آئی اے ایس امتحان کی کامیابی میں گمراہ کن دعوے پر کوچنگ انسٹی ٹیوٹ پر جرمانہ

سینٹرل کنزیومر پروٹیکشن اتھارٹی (سی سی پی اے) نے انڈین سیول سروسز امتحان 2022 میں امیدواروں کی کامیابی میں اس کے تعاون کے بارے میں گمراہ کن اشتہار دینے پر شری رام گروپ کی آئی اے ایس کوچنگ پر 3 لاکھ روپے کا جرمانہ عائد کیا ہے۔

اتوار کو صارفین کے امور، خوراک اور عوامی تقسیم کی وزارت کی طرف سے جاری کردہ ایک ریلیز کے مطابق اس کوچنگ انسٹی ٹیوٹ نے اپنے اشتہار میں "یو پی ایس سی سیول سروسز امتحان 2022 میں 200 سے زیادہ انتخاب" کا دعویٰ کیا تھا۔ اسی اشتہار میں یہ بھی کہا گیاکہ "ہم ہندوستان کا نمبر 1 معروف یوپی ایس سی/آئی اے ایس کوچنگ انسٹی ٹیوٹ ہیں۔" ریلیز میں کہا گیا ہے کہ یہ فیصلہ کنزیومر پروٹیکشن ایکٹ 2019 کی دفعات کے تحت صارفین کے حقوق کے تحفظ اور فروغ کے لیے لیا گیا ہے اور اس بات کو یقینی بنانے کے لیے کیا گیا ہے کہ کسی بھی اشیا یا خدمات کے غلط یا گمراہ کن اشتہارات نہ ہوں۔

سی سی پی اے کے چیف کمشنر ندھی کھرے اور کمشنر انوپم مشرا نے حکم میں کہا کہ کوچنگ انسٹی ٹیوٹ اور آن لائن ایڈٹیک پلیٹ فارم ان ہی کامیاب امیدواروں کے منتخب کردہ کورسز اور ان کورسز کی مدت کا انکشاف کر رہے ہیں تاکہ ممکنہ امیدواروں (صارفین) کو متاثر کیا جا سکے۔ ریلیز میں کہا گیا کہ شری رام گروپ کے آئی اے ایس کوچنگ انسٹی ٹیوٹ نے اپنے جواب میں یو پی ایس سی سی ایس سی 2022 میں 200 سے زیادہ انتخاب کے دعوے کے خلاف صرف 171 کامیاب امیدواروں کی تفصیلات پیش کیں۔ ان 171 امیدواروں میں سے 102 مفت انٹرویو مارگ درشن پروگرام (آئی جی پی) سے تھے، 55 مفت امتحانی سیریز سے تھے، جبکہ 09 جنرل اسٹڈیز کلاس روم کورس سے تھے اور پانچ امیدوار ریاستی حکومت اور ادارے کے درمیان دستخط شدہ ایم او یو سے تھے۔ جنہیں مختلف ریاستوں سے مفت کوچنگ فراہم کی گئی۔ حکم نامے میں کہا گیا کہ ان کے اشتہار میں اس حقیقت کے بارے میں معلومات نہیں دی گئیں جو کہ صارفین کے ساتھ دھوکہ ہے۔