جنوبی کشمیر اور کنگن میں بادل پھٹنے سے بستیاں زیر آب

جموں وکشمیر میں تیز بارشوں کے بیچ کئی علاقوں میں بادل پھٹنے کی وجہ سے سیلابی صورتحال پیدا ہوئی ہے۔معلوم ہوا ہے کہ وسطی ضلع گاندربل کے کنگن ، جنوبی کشمیر کے پلوامہ اور شوپیاں میں بادل پھٹنے کی وجہ سے بستیاں زیر آب آگئی ہیں۔اطلاعات کے مطابق محکمہ موسمیات کی پیشن گوئی کے عین مطابق وادی کشمیر میں ہفتے کی صبح سے بارشیں ہو رہی ہیں۔

نامہ نگار نے بتایا کہ وسطی ضلع گاندربل کے کنگن علاقے میں ہفتے کی صبح بادل پھٹنے کی وجہ سے سیلابی صورتحال پیدا ہوئی ، اس دوران پانی رہائشی مکانوں میں گھس آیا۔ضلعی انتظامیہ کے سینئر آفیسران فوری طورپر جائے موقع پر پہنچے اور پانی کے نکاس کو یقینی بنانے کی خاطر فوری طورپر اقدامات اٹھائیں۔دریں اثنا جنوبی ضلع پلوامہ کے اچھ گوزا علاقے میں بھی ہفتے کے روز بادل پھٹنے کی وجہ سے بستی زیر آب آگئیں۔ تاہم اس دوران کسی کے زخمی ہونے کے بارے میں کوئی اطلاع موصول نہیں ہوئی ہے۔

جنوبی کشمیر کے شوپیاں اور کلگام کے دور افتادہ علاقوں میں بھی بادل پھٹنے کی اطلاعات موصول ہو ئی  ہیں ۔تازہ بارشوں کی وجہ سے وادی کشمیر کے نشیبی علاقوں کی سڑکیں زیر آب ہیں جس وجہ سے لوگوں کو عبور و مرور میں دقتیں پیش آ رہی ہیں۔دریں اثنا محکمہ موسمیات کے مطابق جموں و کشمیر میں 18 سے 20 اگست تک کئی مقامات پر صبح اور شام کے وقت ہلکی سے درمیانی درجے کی بارشوں کے مختصر مرحلوں کا امکان ہے۔انہوں نے کہا کہ بعد ازاں 21 سے 23 اگست تک کہیں کہیں گرج چمک کے ساتھ ہلکی سے درمیانی درجے کی بارشیں ہوسکتی ہیں۔

محکمے نے اپنی ایڈوائزری میں کہا کہ جموں خطے میں بھاری بارشوں سے بعض علاقوں میں اگلے تین دنوں کے دوران سیلابی ریلے، لینڈ سلائینڈنگ، مٹی کے تودے اور چٹانیں کھسک آنے کے خطرات ہیں۔