کھرگون میں آج مساجد اور چرچ میں عبادت نہیں ہوگی

مدھیہ پردیش کے کھرگون علاقہ میں فرقہ وارانہ تشدد کے بعد بہت تناؤ ہے اور اسی کے بیچ آج جمعہ ہے ۔ کھرگون میں کرفیو لگا ہوا ہے اور ایسے حالات میں جمعہ کی نماز مساجد میں ممکن نہیں ہے۔ اس دوران وہاں کی انتضامیہ نے تمام مذاہب کے لوگوں کو گھروں میں ہی رہ کر عبادت کرنے کے لئے کہا ہے۔

مدھیہ پردیش کے کرفیو سے متاثرہ کھرگون ضلع ہیڈکوارٹر میں انتظامیہ کے ساتھ تعاون کرنے کے لیے مختلف معاشروں کے مذہبی رہنماؤں نے گھروں میں رہ کر پوجا کرنے اور نماز پڑھنے پر رضامندی دی ہے۔

آنے والے تہواروں کے پیش نظر آج رات پولیس کنٹرول روم میں ضلع کلکٹر انوگرہ پی اور سپرنٹنڈنٹ آف پولیس انچارج روہت کاشوانی کے ساتھ منعقدہ مختلف مذہبی رہنماؤں کی میٹنگ میں فیصلہ کیا گیا ہے کہ مہاویر جینتی اور امبیڈکر جینتی جس طرح سے منائی گئی اسی طرح اگلے جمعہ کی نماز گھر پر ادا کی جائے گی۔ اس کے علاوہ 15 اپریل کو گڈ فرائیڈے پر چرچ نہ کھولنے اور گھر پر عبادت کرنے پر بھی اتفاق کیا گیا۔

ضلع کلکٹر نے کہا کہ رام نومی کے دن شہر میں کشیدگی کی صورتحال کے بعد پتھر بازی میں شہریوں کو ہوئے مالی نقصان کی تلافی کے لیے ضلع انتظامیہ نے واٹس ایپ پر اطلاعات دینے کی بھی اپیل کی ہے۔ ضلع کلکٹر نے کہا کہ ایک فارم اور شہر کے تحصیلدار کا واٹس ایپ نمبر جاری کیا گیا ہے، جس میں معلومات واٹس ایپ پر دی جا سکتی ہیں۔

کلکٹر نے کہا کہ بدھ کو ہی شہر میں سروے کا کام شروع کر دیا گیا ہے اور جو لوگ رہ گئے ہیں وہ بھی سروے ٹیم کو مطلع کر سکتے ہیں۔