چراغ کہیں این  ڈی اے کو جلا تو نہیں دیں گے، 6  لوک سبھاکی اور ایک راجیہ سبھا کی سیٹ مانگی

چراغ پاسوان کی لوک جن شکتی پارٹی (رام ولاس) کو 18 جولائی کو وزیر اعظم نریندر مودی کی صدارت میں ہونے والی این ڈی اے میٹنگ میں شرکت کے لیے مدعو کیا گیا ہے، لیکن  نیوز پورٹل ’آج تک‘ پر شائع خبر کے مطابق  چراغ پاسوان نے اجلاس میں شرکت کے لیے بی جے پی کے سامنے کچھ شرائط رکھی ہیں۔

این ڈی اے میٹنگ میں شامل ہونے سے پہلے چراغ پاسوان نے بی جے پی کے سامنے ایک مطالبہ رکھا ہے کہ ان کی پارٹی کو لوک سبھا انتخابات میں 6 سیٹیں اور ایک راجیہ سبھا سیٹ ملنی چاہیے، اس کے بعد ہی وہ این ڈی اے میں شامل ہوں گے۔

اگر ذرائع کی مانیں تو چراغ پاسوان کا ماننا ہے کہ ایل جے پی میں تقسیم ہونے سے پہلے پارٹی کو 2019 کے لوک سبھا انتخابات میں 6 سیٹیں ملی تھیں اور اس نے تمام سیٹیں جیت لی تھیں اور اسی وجہ سے چراغ پاسوان نے تمام 6 لوک سبھا نشستوں  پر دعویٰ کیا ہے۔

اہم بات یہ ہے کہ 2021 میں لوک جن شکتی پارٹی میں پھوٹ پڑ گئی تھی اور پھر چراغ پاسوان کے چچا پشوپتی پارس کی قیادت میں راشٹریہ لوک جن شکتی پارٹی بنی تھی،   پشوپتی این ڈی اے میں شامل ہوگئے تھے اور مرکز میں وزیر بن گئے تھے۔ . دوسری طرف چراغ پاسوان کی قیادت میں لوک جن شکتی پارٹی (رام ولاس) بنائی گئی۔

واضح رہے  پشوپتی پارس کا کیمپ مضبوط ہو گیا کیونکہ چراغ پاسوان کے علاوہ لوک جن شکتی پارٹی کے تمام ممبران اسمبلی پشوپتی پارس کی قیادت میں راشٹریہ لوک جن شکتی پارٹی میں شامل ہو گئے۔ اس کے باوجود چراغ پاسوان 2024 کے لوک سبھا انتخابات میں تمام 6 لوک سبھا سیٹوں پر اپنی پارٹی کا دعویٰ کر رہے ہیں اور راجیہ سبھا سیٹ کا مطالبہ بھی کر رہے ہیں۔

اہم بات یہ ہے کہ مرکزی وزیر مملکت برائے داخلہ نتیانند رائے بی جے پی کی جانب سے چراغ پاسوان اور چچا پشوپتی پارس کو متحد کرنے کی مسلسل کوشش کر رہے ہیں، لیکن انہیں اس میں کامیابی نہیں ملی ہے۔ حال ہی میں نیتانند رائے نے چراغ پاسوان سے پٹنہ میں اور پھر پشوپتی پارس سے دہلی میں ملاقات کی تھی لیکن اس کے باوجود چچا اور بھتیجے کے درمیان اختلافات  جاری ہیں۔

دوسری طرف چراغ پاسوان نے اپنے والد آنجہانی رام ولاس پاسوان کی روایتی حاجی پور لوک سبھا سیٹ سے الیکشن لڑنے کا اعلان کیا ہے جہاں سے پشوپتی پارس اس وقت ایم پی ہیں۔ چراغ پاسوان کے اس اعلان سے ناراض پشوپتی پارس نے یہ بھی کہا ہے کہ چونکہ وہ حاجی پور سے موجودہ ایم پی ہیں، اسی لیے وہ 2024 میں بھی اسی سیٹ سے الیکشن لڑیں گے۔